Makiej pra viartańnie miažy z Rasijaj: «Pabačym…»
Ministr zamiežnych spravaŭ Biełarusi Uładzimir Makiej uziaŭ udzieł u mierapryjemstvie «Minski dyjałoh», jaki tradycyjna ładzić «Libieralny kłub». Na hety raz sustreča prymierkavanaja da 25-hodździa zamiežnaj palityki Biełarusi.
Makiej pahadziŭsia adkazać na niekatoryja pytańni žurnalistaŭ. Varta adznačyć, što na pytańni pa-biełarusku spadar ministr taksama adkazvaŭ pa-biełarusku.
U kiraŭnika zamiežnapalityčnaha viedamstva spytalisia pra strachi adnosna taho, što rasijskija vajskoŭcy mohuć zastacca ŭ Biełarusi paśla vučeńniaŭ «Zachad-2017». Jak Makiej aceńvaje takija mierkavańni?
«Nijak nie aceńvaju. Aceńvaju, jak zajavy, jakija nie majuć pad saboj nijakich padstavaŭ. Čytajcie i słuchajcie prezidenta Respubliki Biełaruś, jaki skazaŭ, što suvierenitet i niezaležnaść dla nas — heta śviatoje. Na hetym kropka».
Zusim niadaŭna Rasijaj pieraviała avijarejsy ź Biełarusi z unutranych u mižnarodnyja. Heta nijak nie adabjecca na adnosinach pamiž krainami?
«Ja nie baču tut trahiedyi. Hałoŭnaje, kab našy hramadzianie mieli roŭnyja pravy z rasijskimi. Ab hetym isnujuć damoŭlenaści ŭ ramkach Sajuznaj dziaržavy. Pakul my nie bačym pahroz u dadzienym kirunku», — adznačyŭ ministr.
A ci nie aznačaje heta padrychtoŭku ŭviadzieńnia paŭnavartasnaj miažy pamiž Rasijaj i Biełaruśsiu, spytalisia žurnalisty.
«Pabačym, jak budzie raźvivacca situacyja», — abciakalna adkazaŭ ministr.
Taksama adno z pytańniaŭ tyčyłasia spravy «Biełaha lehijona» i reakcyi na jaje ŭnutry Jeŭrasajuza.
«Ja nie mahu ničoha skazać, jak idzie rasśledavańnie pa spravie «Biełaha lehijona». Heta nie ŭ kampietencyi MZS. Ale pradstavili ŭsiu nieabchodnuju infarmacyju našym jeŭrapiejskim partnioram nakont hetaha, jakaja isnuje na dadzieny momant. Budziem hladzieć dalej», — adznačyŭ spadar Makiej.
