Sud zaniaŭ bok Minharvykankama ŭ sprečcy ab zajaŭcy na Dzień Voli
Sud Maskoŭskaha rajona Minska admoviŭ aktyvistu BCHD i adnamu z byłych zajaŭnikaŭ akcyi pratestu na Dzień Voli Dzianisu Sadoŭskamu ŭ jaho skarzie na dziejańni minskich uładaŭ napiaredadni 25 sakavika. Sadoŭski patrabavaŭ pryznać parušeńniem zakona toje, što Minharvykankam nie daŭ va ŭstanoŭleny zakonam piacidzionny termin da akcyi adkaz ab tym, ci dazvolenaja jana. U sudzie aktyvist navat na palcach adličvaŭ piać dzion ad 25 sakavika. Ale heta nie pierakanała sudździu Alenu Rudnickuju, piša Tut.by.
Dzianis Sadoŭski, fota svaboda.org
Pazicyju haradskich uładaŭ u sudzie pradstaŭlaŭ načalnik adździeła hramadska-masavaj raboty Minharvykankama Juryj Uralski. Pavodle jaho słoŭ, zajaŭka ab praviadzieńni Dnia Voli nie adpaviadała zakonu, tamu što pa maršrucie akcyi byli padziemnyja pierachody i stancyi mietro, a pablizu ich zakon zabaraniaje pravodzić masavyja akcyi.
— Zajaŭniki vydatna viedali, što pa takim maršrucie ich zajaŭka dazvolenaja być nie moža.
Juryj Uralski, fota z sajta Minharvykankama
Uralski abvinavaciŭ arhanizataraŭ u tym, što jany anansavali akcyju da jaje dazvołu i dapuskali «pravakacyjnyja zajavy» ab tym, što jany praviaduć akcyju niezaležna ad taho, ci budzie jana dazvolenaja. Tym nie mienš, pa słovach čynoŭnika, Minharvykankam pajšoŭ im nasustrač.
— Było ŭličana, što dla peŭnaj katehoryi našych suhramadzian 25 sakavika źjaŭlajecca važnaj dataj, śviatam.
Pa jaho słovach, ułady ŭličyli, što na praciahu dziesiacihodździaŭ «skłałasia peŭnaja tradycyja praviadzieńnia ŭ hety dzień masavych mierapryjemstvaŭ u peŭnych miescach, jakija stali tradycyjnymi, i pa vyznačanym maršrucie».
— Data adkazu na sutnaść pryniataha rašeńnia nie paŭpłyvała, — zajaviŭ Uralski. Jon taksama źviarnuŭ uvahu, što Sadoŭski razam ź jašče tryma zajaŭnikami adklikaŭ svaje podpisy 23 sakavika.
Adkazvajučy na pytańni advakata Sadoŭskaha, Uralski, zrešty, pryznaŭ, što da 23 sakavika aktyvist BCHD jašče byŭ zajaŭnikam akcyi. Advakat spytała:
— Možacie skazać, kali ŭ apošni termin pavinien byŭ być dadzieny adkaz, kali prasili 25 sakavika? Napeŭna, heta było 20-je čysło?
— Heta vaša śćviardžeńnie.
— A vy jak ličycie?
— Ja nie mahu ličyć, jość zakon.
Advakat znoŭ pracytavała artykuł zakona ab piacidzionnym terminie adkazu i spytała, kali pavinien byŭ być dadzieny adkaz Minharvykankama.
— Heta treba padličvać.
— Nu padličycie.
Sudździa paprasiła advakata «karektna sfarmulavać pytańnie». Advakat znoŭ spytała pra krajni termin, kali minskija ŭłady pavinny byli dać adkaz.
— Heta treba padličvać. Na dadzieny momant nie mahu skazać, — znoŭ adkazaŭ Uralski.
Sam Sadoŭski taksama nie zmoh damahčysia ad čynoŭnika adkazu na hetaje pytańnie.
— Ja tak razumieju, ličyć da 25 naš pradstaŭnik Minharvykankama ŭmieje, dyk davajcie, moža, paličym.
Zatym aktyvist na palcach adličyŭ ad 25 sakavika piać dzion nazad. Atrymałasia 20 sakavika. Źniaŭšy dva pytańni Sadoŭskaha pra toje, ci pravilna jon paličyŭ, sudździa sama zapytałasia ŭ pradstaŭnika Minharvykankama, ci pavinien być dadzieny adkaz da 20 sakavika.
— Mahčyma, — adkazaŭ Uralski.
— Čamu tady mnie nie byŭ dadzieny adkaz? — spytaŭ Sadoŭski.
— Vy admovilisia ad praviadzieńnia masavaha mierapryjemstva.
— 20 sakavika ja byŭ zajaŭnikam. Ja prasiŭ u vas adkaz, vy mnie jaho nie dali. Čamu?
Pytańnie paŭtaryła i sudździa.
— Nie hatovy dać adkaz, — skazaŭ Uralski.
Sudovaje pasiadžeńnie praciahvałasia jašče kala paŭhadziny. Sprečki dajšli da vyśviatleńnia, čamu Minharvykankam časam daje pravodzić akcyi kala stancyj mietro, a časam nie daje, jak zajaŭniki mahli abskardzić adkaz, kali jany jaho navat i nie atrymali, i ab tym, chto niasie adkaznaść za padziei 25 sakavika.
U pierapynku Uralski admoviŭsia adkazvać na pytańnie, čamu minskija ŭłady nie dali adkaz da 20 sakavika: «Ja vam nijakich intervju davać nie źbirajusia».
Paśla pierapynku sudździa viarnułasia i začytała admovu ŭ zadavalnieńni skarhi. Alena Rudnickaja patłumačyła:
— Sud zychodziŭ z taho, što adkaz ad 24 sakavika byŭ pryniaty Minharvykankamam u miežach svajoj kampietencyi ŭ adpaviednaści ź dziejnym zakanadaŭstvam. Dovady zajaŭnika ŭ častcy taho, što jamu niesvoječasova byŭ nakiravany adkaz, nie mohuć słužyć padstavaj dla zadavalnieńnia zajaŭlenych patrabavańniaŭ.
Paśla zaviaršeńnia pracesu Sadoŭski skazaŭ, što budzie abskardžvać hetaje rašeńnie.
***
Nahadajem, zajaŭniki akcyi na Dzień Voli ŭ Minsku prasili dazvolić šeście ad Akademii navuk pa praśpiekcie Niezaležnaści 25 sakavika. Zakon patrabuje ad miascovych uładaŭ dać adkaz abo nakiravać jaho pa pošcie zajaŭnikam za piać dzion da zapłanavanaj akcyi. Adnak 20 sakavika zajaŭniki tak i nie atrymali adkazu. Minharvykankam niekalki razoŭ pryznačaŭ i admianiaŭ sustreču ź imi. 23 sakavika čaćviora ź piaci zajaŭnikaŭ adklikali svaje podpisy, źniaŭšy ź siabie adkaznaść za praviadzieńnie akcyi. Adkaz z prapanovaj sabracca na płoščy Banhałor Minharvykankam daŭ uviečary 24 sakavika apošniamu zajaŭniku Alaksandru Makovu, jaki ŭ znak niazhody z hetym taksama adklikaŭ svoj podpis. Niesankcyjanavanaja akcyja ŭsio ž adbyłasia — byli zatrymanyja bolš za 700 čałaviek, kala 150 čałaviek atrymali štrafy i «sutki».
