U Rasii druhakłaśniki ŭ maskach sa svastykaj sprabavali vykinuć dziaŭčynku ŭ akno
Vučni druhoha kłasa adnoj sa škoł u Novasibirsku (RF) sprabavali vykinuć svaju adnakłaśnicu z akna i padpalić joj vałasy. Pra heta havorycca ŭ zajavie baćkoŭ dziaŭčynki, padadzienaj na imia dyrektara navučalnaj ustanovy. Z dakumientam aznajomiłasia redakcyja «NHS.Novosti».
U im havorycca, što 5 maja na pierapynku pierad apošnim urokam vučanica zastałasia ŭ kłasie, dzie, akramia jaje, na pieršy pohlad, nikoha nie było. Niečakana z-pad part vyskačyli chłopčyki ŭ maskach, zroblenych, imavierna, z mužčynskich škarpetak, z vyjavaj svastyki. Jany ŭdaryli jaje ŭ žyvot, pavalili na padłohu i źviazali ščylnaj viaroŭkaj nohi i ruki. Joj zatyknuli rot i zakryli vočy i napierad nahami paciahnuli da adkrytaha akna na druhim paviersie.
U hety momant dziaŭčyncy ŭdałosia vyzvalić ruki, jana stała aktyŭna supraciŭlacca i ŭ vyniku ŭpała z padakońnika na padłohu, stuknuŭšysia śpinoj. Da jaje padbieh vučań z zapalničkaj i pasprabavaŭ padpalić vałasy, adnak dziaŭčyncy ŭdałosia vybić zapalničku ŭ jaho z ruk. Zatym praźvinieŭ zvanok na ŭrok.
Pa słovach baćkoŭ, ich dačka śćviardžaje, što za niekalki dzion da hetaha da adkrytaha akna ciahnuli jašče adnu dziaŭčynku. Miarkujučy pa tekście dakumienta, toj ža vučań niezadoŭha da taho zdareńnia kazaŭ: «Vy ŭsie achviary, akramia chłopčykaŭ, miesca vašaj śmierci, dziaŭčaty, vuń toje akno».
Dyrektar škoły Viktar Zaŭjałaŭ rastłumačyŭ, što ŭ škole ŭžo praviali svajo rasśledavańnie i ŭ bližejšy čas adbudziecca baćkoŭski schod, na jakim abmiarkujuć, jak dzieci «adčuvajuć siabie, jak kantaktujuć».
U pres-słužbie abłasnoha hłaŭka MUS paviedamili, što supracoŭniki palicyi pravodziać pravierku infarmacyi.
