U asnovu novaj internet-palityki Rasii lahli «tradycyjnyja kaštoŭnaści»
Prezident Rasii Uładzimir Pucin zaćvierdziŭ novuju stratehiju raźvićcia infarmacyjnaha hramadstva da 2030 hoda, u jakoj u jakaści adnaho z asnoŭnych pryncypaŭ paznačany «pryjarytet tradycyjnych rasijskich duchoŭna-maralnych kaštoŭnaściaŭ», paviedamlaje VVS.
TASS
U apublikavanym na aficyjnym partale pravavoj infarmacyi dakumiencie havorycca, što «rasijskaje hramadstva zacikaŭlenaje ŭ atrymańni infarmacyi, adpaviednaj vysokamu intelektualnamu i kulturnamu ŭzroŭniu raźvićcia hramadzian Rasii».
Aŭtary adznačajuć, što «źmiaščeńnie akcentaŭ va ŭsprymańni navakolnaha śvietu, asabliva ŭ sietcy internet, z navukovaha, adukacyjnaha i kulturnaha na zabaŭlalna-daviedačny sfarmavała novuju madel ŭsprymańnia — tak zvanaje klipavaje myśleńnie». Admietnaj asablivaściu hetaj tendencyi aŭtary ličać masavaje paviarchoŭnaje ŭsprymańnie infarmacyi.
Takaja situacyja «spraščaje ŭpłyŭ na pohlady i pieravahi ludziej», što «daje pieravahu ŭ dasiahnieńni ekanamičnych i palityčnych metaŭ tym dziaržavam i arhanizacyjam, jakim naležać technałohii raspaŭsiudžvańnia infarmacyi», — havorycca ŭ dakumiencie.
U liku metaŭ stratehii pakazvajecca stvareńnie ŭmoŭ dla farmavańnia ŭ Rasii «hramadstva viedaŭ». Dla farmavańnia «infarmacyjnaj prastory viedaŭ», na dumku aŭtaraŭ, nieabchodna «pravodzić mierapryjemstvy ŭ halinie duchoŭna-maralnaha vychavańnia hramadzian».
Dakumient taksama prapanuje «stvaryć umovy dla papularyzacyi ruskaj kultury i za miažoj» dla spynieńnia sprob «skažeńnia i falsifikacyi histaryčnych i inšych faktaŭ».
Siarod inšych mier stratehija zahadvaje ŭdaskanalvać zakanadaŭčyja sposaby rehulavańnia dziejnaści ŚMI, a taksama internet-telebačańnia, navinavych ahrehataraŭ, sacyjalnych sietak, internet-sajtaŭ i miesiendžaraŭ.
Dla ŭstojlivaj pracy infarmacyjnaj infrastruktury aŭtary dakumienta prapanujuć zamianić impartnaje abstalavańnie i prahramnaje zabieśpiačeńnie rasijskimi anałahami. Stratehija taksama praduhledžvaje vykarystańnie ajčynnych srodkaŭ šyfravańnia pry abmienie danymi ŭ orhanach ułady.
Dakumient ustupaje ŭ siłu z momantu padpisańnia prezidentam. Ciapier urad pavinien da 1 kastryčnika 2017 hoda zaćvierdzić płan realizacyi stratehii.
Papiaredniaja stratehija raźvićcia infarmacyjnaha hramadstva była pryniataja ŭ 2008 hodzie. Jana dziejničała da 2015 hoda.
