Labiedźka pieradaŭ čysty arkuš papiery ministru Šunieviču — dla rapartu ab adstaŭcy
Siońnia staršynia Abjadnanaj hramadzianskaj partyi Anatol Labiedźka pieradaŭ u pryjomnuju hramadzianaŭ Ministerstva ŭnutranych spraŭ zvarot da ministra — čysty arkuš papiery.
Da pryjomnaj MUS Labiedźka pryjšoŭ adzin, ale ŭvaha da jahonaj persony była vialikaja: dva videaaperatary ŭ cyvilnym jaho zdymali, a na roznych bakach vulicy Haradzki Vał znachodzilisia čatyry milicyjanty ŭ čynie pałkoŭnikaŭ i padpałkoŭnikaŭ.
Sens svajoj akcyi spadar Labiedźka patłumačyŭ:
«Na vialiki žal, padstava dla naviedvańnia MUS dastatkova sumnaja, tamu što toje, što adbyłosia 1 traŭnia — heta prosta žach, heta «adryžka savieckich časoŭ». Ja tut vystupaŭ advakatam nia tolki svajho namieśnika Vasila Palakova, čałavieka vielmi intelihientnaha, spakojnaha, jakoha pryvieźli ŭ sud u kajdankach, praviali zakryty sudovy praces, nie puścili syna, jaki zaraz pavinien pajści słužyć u vojska.
Ja pieradaŭ načalniku pryjomnaj, što palityka palitykaj, ale pavinny być i niejkija čałaviečyja adnosiny. Ja raskazaŭ i pra Alaksandra Kabanava, jakoha blakavali ŭ kvatery i pakarali 11 sutkami tolki za toje, što jon zajaviŭ, što vyjdzie ŭ centar Bieraścia z čystym arkušam papiery. Što, u nas pačali sudzić užo za namier? Jon nie ŭčyniŭ jašče ničoha, a jaho sudziać! Heta jak ŭ bajcy pra cyhana, jaki adpraŭlaje syna pa małako, daje zban i łupcuje: «A nie raźbi zban». U jaho pytajucca: «Za što ty jaho bješ, jon ža ničoha jašče nie raźbiŭ». «A tady pozna budzie», — adkazvaje cyhan. Voś i ŭ našych pravaachoŭnych arhanaŭ takija cyhanskija zamaški.
Tamu hety čysty list papiery — z adnaho boku, takaja akcyja salidarnaści z Kabanavym, Sieviaryncam, Viniarskim, bieraściejskimi i baranavickimi aktyvistami (bolš za 10 čałaviek za 1 traŭnia znachodziacca za kratami).
Druhoje — heta prapanova ministru ŭnutranych spraŭ Iharu Šunieviču napisać rapart na hetym arkušy i padać u adstaŭku.
Mnie adkazali: na miesca hetaha hienerała pryjdzie inšy. Ja zaŭvažyŭ, što 7 traŭnia — sumnaja data: 18 hadoŭ tamu źnik «inšy» milicejski hienerał —Jury Zacharanka.
Da taho ž ja pieradaŭ zajavu palityčnaj rady partyi, jakuju my pryniali siońnia, nakont padziejaŭ 1 traŭnia. Pałkoŭnik u mianie zajavu i čysty arkuš pryniaŭ».
Anatol Labiedźka paviedamiŭ, što spadziajecca na reakcyju, i pryvioŭ prykład, jak paśla jahonaj raniejšaj zajavy, što ŭ adnym z pastarunkaŭ Savieckaha rajonu śmiardzić kanalizacyja, tam zrabili ramont. Arhument byŭ taki: «Kali samim milicyjantam nia soramna tam pracavać, to apazycyjaneram, jakich tudy pryvoziać, soramna za milicyju».
