Były supracoŭnik KDB uciok u Šviecyju i śćviardžaje, što maje dakumienty pra kantrabandu naftapraduktaŭ praź Biełaruś
Były supracoŭnik biełaruskaha KDB Andrej Moŭčan śćviardžaje, što maje dakumienty, jakija śviedčać ab kantrabandzie naftapraduktaŭ ź Biełarusi. Jon pieradaŭ hetyja dakumienty Šviedskamu radyjo.
Šviedskaje radyjo nie publikuje tvara Moŭčana, abmiažoŭvajecca fota čałavieka za rabotaj.
Jak vynikaje z vajskovaha bileta Moŭčana, jon pracavaŭ u KDB z 2000 da 2010 hoda i dasłužyŭsia da zvańnia majora. Žychar Viciebska Moŭčan u 2012-m paprasiŭ palityčny prytułak u Šviecyi, ale jamu admovili, bo nie pabačyli dokazaŭ palityčnaha pieraśledu. Moŭčan śćviardžaŭ, što zvolniŭsia, bo nie chacieŭ udzielničać u palityčnych represijach i što jaho pieraśledavali i źbivali paśla zvalnieńnia z KDB.
Z dakumientaŭ Moŭčana vynikaje, što biełaruskija kampanii ekspartavali naftapradukty pad vyhladam raspuščalnikaŭ, kab nie pieraličvać myty Rasii. Publikacyi pra isnavańnie takich schiem źjaŭlalisia ŭ rasijskich i biełaruskich ŚMI ŭ 2010—2012 hadach. Rasśledavańnie hetaha pytańnia pryviało da naftavaha kanfliktu Maskvy i Minska ŭ 2012-m.
Moŭčan śćviardžaje, što nie apublikavaŭ dakumientaŭ raniej, bo bajaŭsia.
Z dakumientaŭ vynikaje, što biełaruskija mytniki spyniali ciahniki z dyzielnym palivam, što pa dakumientach prachodziła jak raspuščalnik, ale atrymali zahad ad vice-premjera ŭrada Biełarusi Uładzimira Siamaški nie razhladać dadzieny hruz jak padmytny i nie nakiroŭvać uzor pradukcyi dla analizu ŭ rasijskuju łabaratoryju.
Hruz kiravaŭsia praz Talin. Tam «raspuščalnik» iznoŭ pieratvaraŭsia ŭ «rasijskaje dyzpaliva», jakoje adpraŭlali ŭ port Antvierpiena (Bielhija).
Pa słovach Moŭčana, jamu zahadali adpravić usie dakumienty pa spravie ab kantrabandzie ŭ Minsk, ale jon zrabiŭ kopii ŭsioj tečki i navat zachavaŭ niekatoryja aryhinały papier.
Šviedskaje radyjo paviedamlaje, što jano nie zdoleła atrymać kamientaroŭ pres-słužby ŭrada i prezidenta Biełarusi.
