Daniłaŭ z turmy zaklikaje pisać listy fihurantam «Spravy patryjotaŭ»
Pra toje, jak siabie adčuvaje, što čytaje, a taksama pra svaje patreby piša Viktar Daniłaŭ, abvinavačany pavodle artykułaŭ 293-1 dy 287 Kryminalnaha kodeksu.
U liście da siabra Daniłaŭ piša, što trymajecca dobra, nastroj badziory. Zhadvaje, što «znachodžańnie tut — nie samy cikavy čas, ale heta vyprabavańnie, jakoje varta prajści». Taksama Viktar dziakuje za padtrymku z voli, jakaja adčuvajecca i za turemnymi murami.
Hałoŭnaja niastača adčuvajecca ŭ infarmacyi. Z presy chłopiec atrymlivaje «Viačerni Minsk», jaki nazyvaje «adavaj hazietaj» dy «ahratrešam». Ratujuć knihi, jakija jość u turemnaj biblijatecy: Karatkievič, Siankievič, Daŭłataŭ, Nicše… «Biez knih byŭ by sapraŭdny «Dzień Surka», — piša Daniłaŭ.
Na charčavańnie nie skardzicca: kašy, supy, bihus. Zrešty, turemnaje charčavańnie mała adroźnivajecca ad vajskovaha, tamu dla Viktara tut ničoha novaha niama. «Usio ŭ lepšych tradycyjach», — reziumuje aŭtar lista.
Pra asabistyja patreby Daniłaŭ ničoha nie piša, adno prosić padtrymlivać inšych chłopcaŭ, fihurantaŭ «Spravy patryjotaŭ»: «Što da patrebaŭ — kali łaska, pišycie našym źniavolenym chłopcam listy i paštoŭki! Im heta zaraz vielmi treba. Heta hreje i nadaje viery ŭ našu ahulnuju Spravu».
Nahadajem, što Viktar Daniłaŭ byŭ zatrymany 21 sakavika, dźviery ŭ jaho kvateru byli vyłamanyja śpiecnazam KDB «Alfa». Chłopca spačatku ŭtrymlivali ŭ SIZA KDB, paśla pieraviali ŭ SIZA №1 MUS (Vaładarka). Viktar byŭ instruktaram «Čyrvonaha Kryža» dy vioŭ hurtok pa dapryzyŭnaj padrychtoŭcy ŭ adnoj ź minskich škołaŭ, dapamahaŭ u raspaŭsiudzie vydańniaŭ «Knihazboru». Na voli ŭ jaho zastałasia niaviesta Jula.
Napisać chłopcu možna pa adrasie: 220050, Minsk, vuł. Vaładarskaha, 2, SIZA-1, Daniłavu Viktaru Kanstancinaviču.