Palicejskija ŭ Paryžy viarnuli da žyćcia žančynu, pryznanuju pamierłaj
AFP
Palicejskim u francuzskaj stalicy ŭdałosia reanimavać žančynu, jakuju supracoŭniki chutkaj dapamohi abviaścili pamierłaj za hadzinu da hetaha.
49-hadovaja žančyna, imia jakoj nie nazyvajecca, užo šmat hadoŭ pakutuje na anareksiju. 18-hadovaja dačka žančyny znajšła jaje niežyvoj na padłozie, i było padobna, što maci pierieniesła infarkt.
Paśla vykliku prybyli daktary chutkaj dapamohi, adnak sproby viarnuć žančynu da žyćcia byli biespaśpiachovyja.
Ale praz hadzinu dvoje paryžskich palicejskich, jakija prybyli dla taho, kab skłaści pratakoł pra pryčynu śmierci, prypadniali koŭdru, što nakryvała žančynu, i zaŭvažyli prykmiety žyćcia.
Adzin ź ich pravieryŭ jaje puls na šyi i vyjaviŭ, što jaje serca ŭsio jašče bjecca.
Pakul adzin z uzrušanych palicejskich trymaŭ žančynu za ruku i sprabavaŭ ź joj razmaŭlać, druhi terminova patelefanavaŭ u miascovuju pažarnuju słužbu, dzie jamu padrabiazna patłumačyli, jak zrabić štučnaje dychańnie i niepramy masaž serca.
Paśla 30 chvilinaŭ hetaj pracedury žančyna ačuniała. Jaje dastavili ŭ balnicu, dzie jana praviała ŭžo amal tydzień i zaraz idzie na papraŭku.
Ivan Asiama, kiraŭnik miascovaha adździaleńnia prafsajuza palicejskich, nazvaŭ «uvaskrašeńnie» žančyny fantastyčnym i niejmaviernym vypadkam.
«Našy kalehi kažuć, što heta było padobna na epizod ź sieryjała «Chadziačyja mierćviaki», — kaža jon.
Kiraŭnik miascovaj palicyi zaklikaŭ prysvoić abodvum palicejskim uznaharodu za prajaŭlenuju mužnaść.
