Łukašenka — pra škołu: Prahramu skaracić, padručniki — novyja, uroki — z 9 ranicy
Niahledziačy na nieadnarazovyja patrabavańni, zadačy spraścić školnuju prahramu i nablizić jaje da žyćcia, palepšyć jakaść padručnikaŭ i nie pierahružać školnikaŭ, u poŭnaj miery nie vyrašany, zajaviŭ Łukašenka, źviartajučysia da naroda i parłamienta.
Ad niadaŭna pryznačanaha ministra Ihara Karpienki Łukašenka zapatrabavaŭ udvaja skaracić terminy padrychtoŭki novaj prahramy dla siaredniaj škoły. «Inakš navošta ministra źmianiali. Zrabicie heta ŭsio za leta, da novaha navučalnaha hoda. Hałoŭnaje — dać nastaŭniku hetuju prahramu. Jon užo pa prahramie pavinien znajści hetyja viedy, hetyja padručniki, chrestamatyi i inšaje … Ale my možam i knižki napisać chutka i apieratyŭna. Treba vydzielić hetyja srodki, nievialikija, i paprasić, kab napisali novyja padručniki», — zajaviŭ kiraŭnik dziaržavy.
«Dumaŭ, što my nie toje stvaryli ŭ humanitarnaj śfiery, - praciahvaŭ jon. - Ale my nałamali droŭ u matematycy i fizicy ŭ škole stolki, što strašna hladzieć na padručniki. Kaho vy rychtujecie?»
Łukašenka ŭpeŭnieny, što, uskładniajučy praces navučańnia i padkidvajučy składanyja padručniki ŭ škole, «my adšturchoŭvajem dziaciej atrymlivać viedy», asabliva ŭ fizicy, matematycy, inšych dakładnych navuk. «Niešta prapuściŭ, i adbyłosia adryńvańnie ŭ siłu składanaści materyjału. Potym nie naviarstaješ. Čamu na fizmat dniom z ahniom nie znajści rabiat? My zahubili ich u škole!», padkreśliŭ jon.
U vyniku pradmiet pa siłach tolki nievialikaj kolkaści «jajcahałovych». «A siarednich i vyšej siaredniaha my zahubili i adšturchnuli składanaściu materyjału. Heta ž kašmar. Alaksandr Michajłavič (Radźkoŭ), zajmiciesia nieadkładna vy ž zdarovy čałaviek, čałaviek prezidenta - napišycie hetyja padručniki, źbiarycie ludziej! My ž ździekvajemsia ź dziaciej! Čamu jany ŭ nas stali harbatymi — skalijoz, skleroz i inšaje», - aburyŭsia Łukašenka.
Jon pryvioŭ prykład z ułasnaha žyćcia, panarakaŭšy, što ŭ sieradu ŭ syna Mikałaja było siem urokaŭ, «dzicia pračynajecca a pałovie siomaj…» «Treba jašče razabracca Karpienku: z 9 hadzin treba pačynać vučobu! I nie hladzieć na toje, što baćkam składana ŭ škołu adpravić dzicia, tamu što jany raniej iduć na pracu. Hadzinu ranicaj dziciaci paspać — heta taho kaštuje!» — arhumientavaŭ Łukašenka.
«Biazładździe ŭ škole ŭ elemientarnych rečach! U škole nielha nad dziećmi ździekavacca, my ž invalidaŭ rychtujem! »- rieziumavaŭ jon.
Usie prablemy prezident zapatrabavaŭ vyrašyć užo ŭ hetaj piacihodcy.