Ułady Afhanistana: Udar «maci ŭsich bombaŭ» zabiŭ 90 bajevikoŭ ID
Jak minimum 90 bajevikoŭ hrupoŭki «Isłamskaja dziaržava» zahinuli ŭ vyniku avijaŭdaru ZŠA, u jakim była ŭžytaja adna z najmahutniejšych niajadziernych bombaŭ u arsienale krainy, paviedamiŭ VVS hubiernatar afhanskaha rajona Ačin ŭ pravincyi Nanharchar Ismaił Šynvary.
Pa jaho słovach, achviar siarod hramadzianskich asob niama.
Jak adznačyŭ premjer-ministr Afhanistana Abduła Abduła, udar byŭ naniesieny ŭ kaardynacyi z afhanskimi ŭładami i byli zroblenyja «surjoznyja zaściarohi, kab paźbiehnuć naniasieńnia škody hramadzianskim asobam».
Pry hetym adzin ź miascovych žycharoŭ raspavioŭ, što ŭ vyniku vybuchu byli źniščanyja niekalki damoŭ. Jon taksama dadaŭ, što mahutny vybuch «aśviatliŭ usio načnoje nieba».
Bomba GBU-43/B MOAB daŭžynioj dzieviać mietraŭ i vahoj amal 10 ton, viadomaja jak «maci ŭsich bombaŭ», była ŭpieršyniu vyprabavanaja ŭ 2003 hodzie i raniej u bajavych umovach nie ŭžyvałasia.
U noč na piatnicu jaje skinuli na kompleks tunelaŭ ŭ pravincyi Nanharchar niedaloka ad miažy z Pakistanam, jakija vykarystoŭvajucca bajavikami hrupoŭki «Isłamskaja dziaržava».
Apieracyja była ŭchvalenaja ŭradam krainy, ale vyklikała krytyku z boku byłoha prezidenta Afhanistana Chamida Karzaja, jaki nazvaŭ jaje «biesčałaviečnym i hrubym vykarystańniem našaj krainy ŭ jakaści palihona dla novaj i niebiaśpiečnaj zbroi».
