Piać faktaŭ pra novaha biełaruskaha palitviaźnia Dźmitryja Palijenku
Pravaabarončyja arhanizacyi Biełarusi pryznali anarchista Dźmitryja Palijenku palityčnym źniavolenym.
Nahadajem, pierad prezidenckimi vybarami-2015 Alaksandr Łukašenka vypuściŭ z turmy Mikałaja Statkieviča i niekalki inšych «palityčnych». Adnak ciapier kolkaść viaźniaŭ sumleńnia znoŭ pačynaje raści.
Palijenka staŭ trecim u hetym śpisie — uśled za viciebskim aktyvistam Michaiłam Žamčužnym (u jaho dačynieńni patrabujecca nie biezumoŭnaje vyzvaleńnie, a spraviadlivy razhlad spravy) i anarchistam Viačasłavam Kasinieravym, jakoha čakaje sud za pierformans kala pomnika haradavomu.
«Naša Niva» sabrała niekalki faktaŭ pra Dźmitryja Palijenku — čałavieka, čyjo znachodžańnie ŭ kałonii ciapier pastrožyć adnosiny pamiž Minskam i Zachadam.
Pačynaŭ jak nacboł
Karani palityčnaj aktyŭnaści Palijenki sychodziać u nacyjanał-balšaviscki ruch. Rasijskaj ideałohijaj «nacbolstva» Palijenka zacikaviŭsia, nasłuchaŭšysia piesień viadomaha panka Jahora Letava, jaki i byŭ adnym z zasnavalnikaŭ «NBP» — ruchu, navat u Rasii ŭ vyniku pryznanaha ekstremisckim.
Paśla pary hadoŭ aktyŭnaści ŭ jakaści nacboła Palijenka, ź jaho słovaŭ, pierajšoŭ da anarchizmu, ale ideałam Letava nie zdradziŭ:
«Ja vieru ŭ toje, što źniščeńnie ŭłady čałavieka nad čałaviekam pryviadzie da hramadstva, dzie kožny žyvie dla siabie. Daviałosia tut padumać nakont realizacyi… znachodžu prosty adkaz, uzhadvajučy pieśniu Letava — «Zabi ŭ sabie dziaržavu!». Da hetaha prosta treba imknucca! Zabivać pryviazku da dziaržaŭnaj (kantralujemaj) mašyny», — kazaŭ Palijenka pra svaje palityčnyja pohlady.
Pracavaŭ na MAZie
Dźmitryj Palijenka maje niekalki rabočych śpiecyjalnaściaŭ, niekali pracavaŭ ślesaram na MAZie. Ale apošnim časam pierabivaŭsia padpracoŭkami, vyšejšaj adukacyi nie mieŭ. Jaho baćka — invalid pa zroku, maci pamierła niekalki hadoŭ tamu.
Nakiroŭvaŭsia ŭ ŁPP
U 2014 hodzie Palijenka pa rašeńni suda byŭ adpraŭleny ŭ ŁPP praz prablemy z ałkahalizmam.
Cikavy fakt: padčas etapavańnia ŭ ŁPP Palijenka ŭciok, kali jaho vyviali ŭ les spravić patreby. Kala miesiaca jon žyŭ «pa ŭpiskach», pakul ŭrešcie nie trapiŭsia milicyi — zatrymlivali prosta na vulicy sa słovami «Nu pajechali, Palijenka».
U 2016 hodzie sudździa taksama pastanaviŭ Palijenku prajści prymusovaje lačeńnie ad ałkahalizmu.
«Nieluboŭ» da milicyi
Da supracoŭnikaŭ milicyi Palijenka adčuvaje nieprychavanuju nieluboŭ: nie nazyvaje ich inačaj, jak «m*sarami», u sudzie nad saboj trymaŭ u rukach tečku z abrevijaturaj UPSK (Usie psy sistemy — kurvy). Zrešty, mienavita pa artykule 364 Kryminalnaha kodeksa (hvałt albo pahroza ŭžyvańnia hvałtu ŭ dačynieńni da supracoŭnikaŭ orhanaŭ unutranych spravaŭ) Palijenku i asudzili da 2 hadoŭ pazbaŭleńnia voli z adterminoŭkaj. Aktyvista piać miesiacaŭ pratrymali ŭ śledčym izalatary, ale ŭ sudzie vypuścili.
Historyja była takaja: Palijenka dałučyŭsia da «Krytyčnaj masy» — masavaha prabieha ravarystaŭ. Padčas ruchu niekalki čałaviek vyjechali na prajeznuju častku, supracoŭniki DAI zapatrabavali ich pakinuć jaje, tyja nie padparadkavalisia. Zaviazałasia patasoŭka, u vyniku jakoj u daišnika akazałasia parvanaja kurtka.
«Sam ja nie bačyŭ, što mienavita jon parvaŭ kurtku. Pretenzij da jaho nie maju, majomasnych pretenzij nie zajaŭlaŭ. Nijakaha źbićcia i inšych fizičnych traŭm u mianie nie było», — zajaviŭ u sudzie daišnik.
U sudzie Palijenka maŭčaŭ, ale ŭ tłumačeńniach, jakija ŭ jaho ŭziali nieŭzabavie paśla zatrymańnia, chłopiec śćviardžaŭ, što schapiŭ inśpiektara Kałtunova za ruku, kab spynić źbićcio Kanavałava.
Jašče adno abvinavačańnie suprać jaho — za «raspaŭsiud parnahrafičnych materyjałaŭ». Palijenka na svajoj staroncy ŭ sacsietkach źmiaściŭ spasyłku na 19-siekundny rolik pad nazvaj «BiełMuzTV pakazvaje porna» (u 2013 hodzie inžynier kanała, jaki mieŭ asabistyja kryŭdy da pracadaŭcaŭ, sapraŭdy vydaŭ porna ŭ žyvy efir).
Adznačym, što jašče da atrymańnia terminu Palijenka atrymlivaŭ štrafy i sutki za ŭdzieł u akcyjach pratestu. Zdarałasia, što jaho sadžali «previentyŭna» — naprykład, pierad čempijanatam śvietu pa chakiei.
Zamiest umoŭnaha — realny termin
Svoj realny termin Palijenka atrymaŭ za parušeńni, ździejśnienyja ŭ čas znachodžańnia «pad umoŭkaj».
U sakaviku 2017 hoda jon pačaŭ kryčać «Hańba!» u pamiaškańni suda padčas vyniasieńnia prysudu byłym fanatam «Partyzana» pa tak zvanaj «spravie antyfašystaŭ», za što byŭ pakarany 7 sutkami aryštu.
Nastupnyja 15 sutak Palijenka atrymaŭ za ŭdzieł u schodzie suprać budaŭnictva biznes-centra ŭ rajonie Kurapataŭ. U dzień, kali aktyvist musiŭ vyjści na svabodu, stała viadoma, što jamu prysudzili jašče 10 sutak.
