U «Drazdach-2» novy žychar — sakratar Rady biaśpieki Stanisłaŭ Zaś
«Naša Niva» praciahvaje cykł materyjałaŭ pra žycharoŭ «Drazdoŭ-2» — elitnaha pasiołka na ŭskrajku Minska.
Jak nam stała viadoma, prava pabudavać katedž atrymaŭ čarhovy čynoŭnik — sakratar Rady biaśpieki Stanisłaŭ Zaś.
Čytajcie taksama: Dziaržsakratarom Rady biaśpieki staŭ Stanisłaŭ Zaś — piać faktaŭ
15 sotak ziamli ŭ vodaachoŭnaj zonie «Drazdoŭ-2» dastalisia jamu pavodle rašeńnia Minharvykankama №923 (dla słužbovaha karystańnia) ad 16 sakavika 2017 hoda.
Fota Siarhieja Hudzilina.
Farmalnym ułaśnikam ziamli zastajecca dziaržava, ale Zaś atrymlivaje nadzieł u pažyćciovaje spadčynnaje vałodańnie — h.zn. pakinie jaho dzieciam i unukam.
Cikava, što častka nadziełu, jaki dastaŭsia siłaviku, da niadaŭniaha času vykarystoŭvaŭsia ŭ jakaści budaŭničaj placoŭki tenisnaha centra. Jaho ŭzvodzić navapołackaja kampanija «Interservis», padkantrolnaja miljanieram Alaksandru Šakucinu i Mikałaju Varabju. Pavodle taho samaha rašeńnia dla słužbovaha karystańnia, ziamlu inviestaram padrezali, kab pamiaścić katedž Zasia.
Čytajcie taksama. Sakratar Rady biaśpieki: Na Dzień Voli nivodny milicyjant u Minsku nie dastaŭ dubinki
Kab pačać budaŭnictva doma, Zasiu daviadziecca pasunuć pabudovy Šakucina. Fota Siarhieja Hudzilina.
Pakolki sakratar Rady biaśpieki nie paśpieŭ na asnoŭnuju razdaču ŭčastkaŭ čynoŭnikam u «Drazdach-2», jakaja adbyvałasia na praciahu 2013—2014 hadoŭ, jamu dastałasia ziamla z «druhoj čarhi».
Najbližejšaj susiedkaj Zasia stanie kiraŭnica Administracyi prezidenta Natalla Kačanava. A z voknaŭ budzie vidać amfiteatr, jaki buduje śpiavak Anatol Jarmolenka, a taksama katedžy adstaŭnikoŭ — kolišniaha vice-śpikiera Savieta respubliki Michaiła Matusieviča i eks-staršyni «Biełnaftachima» Alaksandra Baroŭskaha.
Nahadajem, što ziamla pad budaŭnictva katedžaŭ u Minsku raźmiarkoŭvajecca nastupnym čynam: spačatku jaje musiać prapanavać šmatdzietnym siemjam z čarhi. Kali achvotnych niama, nadzieł vystaŭlajecca na aŭkcyjon. Zaś atrymaŭ ziamlu pa-za hetymi praviłami.
Va ŭłasnaści siamji Zasia zastajecca trochpakajoŭka płoščaj bolš za 80 m2 na vulicy Panamarova ŭ Minsku.
Dom na vulicy Panamarova.
Žonka sakratara Rady biaśpieki Inesa Zaś vykładaje na kafiedry zamiežnych movaŭ Pieduniviersiteta.
* * *
Stanisłaŭ Zaś
Naradziŭsia 18 žniŭnia 1964 hoda ŭ Čarnihaŭskaj vobłaści Ukrainy. Skončyŭ Bakinskuju vyšejšuju ahulnavajskovuju kamandnuju vučelniu, Vajskovuju akademiju Biełarusi, Vajskovuju akademiju Hienštaba Uzbrojenych siłaŭ Rasii. Słužyŭ va Uzbrojenych siłach, MUS, KDB, Pamiežnych vojskach. Z 2008 — namieśnik hiensakratara Rady biaśpieki.