Śpiecsłužby ZŠA pierachapili pieramovy ab padrychtoŭcy chimataki ŭ Siryi
Vašynhton pierachapiŭ pieramovy siryjskich vajskoŭcaŭ i śpiecyjalistaŭ pa chimičnaj zbroi, jakija abmiarkoŭvali padrychtoŭku da chimičnaj ataki ŭ Idlibie, paviedamlaje CNN. Pa dadzienych vydańnia, hetyja pieramovy «nie pakidajuć sumnievaŭ» u vinavataści Bašara Asada.
Fota: Mohamed Al-Bakour / AFP
Vyviedka ZŠA pierachapiła pieramovy siryjskich vajskoŭcaŭ i śpiecyjalistaŭ pa chimičnaj zbroi, jakija abmiarkoŭvali padrychtoŭku da chimičnaj ataki z užyvańniem zarynu ŭ Idlibie, paviedamlaje CNN sa spasyłkaj na vysokapastaŭlenaha čynoŭnika administracyi Donalda Trampa.
Surazmoŭca CNN raspavioŭ, što ZŠA pierachoplivajuć vialiki abjom paviedamleńniaŭ u takich krainach, jak Siryja i Irak, adnak hetyja dadzienyja čaściakom tak nikoli i nie apracoŭvajucca, «kali nie adbyvajecca niejkaja kankretnaja padzieja, jakaja patrabuje ad analitykaŭ pošuku raźviedvalnych materyjałaŭ».
Pierachoplenyja pieramovy adbylisia da incydentu z užyvańniem chimičnaj zbroi ŭ Chan-Šejchunie, adnak byli vyvučany ŭžo paśla napadu dla taho, kab vyśvietlić, chto niasie za jaje adkaznaść, pakazvaje surazmoŭca CNN. Pavodle jaho słoŭ, pierachoplenyja pieramovy «nie pakidajuć sumnieńniaŭ», što adkaznaść za ataku lažyć na prezidencie Siryi Bašaru Asadzie. Amierykanski čynoŭnik taksama adznačyŭ, što ruskija bolš aściarožnyja ŭ svaich pieramovach.
Pavodle jaho słoŭ, u ciapierašni čas samym važkim dokazam taho, što da chimičnaj ataki ŭ pravincyi Idlib 4 krasavika datyčnyja rasiejskija vajskoŭcy, zastajecca rasijski bieśpiłotny aparat, zaŭvažany nad balnicaj, u jakoj atrymlivali dapamohu paciarpiełyja padčas hetaj chimičnaj ataki. «U ZŠA jość kankretnyja vyvieddadzienyja, jakija pakazvajuć, što heta byŭ ruski biecpiłotnik», — adznačaje CNN.
Chimataka ŭ nasielenym punkcie Chan-Šejchun na poŭdni pravincyi Idlib u Siryi adbyłasia 4 krasavika. Achviarami jaje, pa dadzienych JUNISIEF, stała bolš za 80 čałaviek, nie mienš za 500 paciarpieli.
Prezident Rasii Uładzimir Pucin zajaviŭ, što jość dźvie viersii chimičnaj ataki ŭ siryjskim Idlibie. Pieršaj viersijaj prezident nazvaŭ ŭdar avijacyi Siryjskaj Arabskaj Respubliki (SAR) pa padpolnym cechu z atrutnymi rečyvami. Druhoj viersijaj, pa słovach prezidenta Rasii, moža być «prosta pastanoŭka, heta značyć pravakacyja». «Heta admysłova zroblena dla taho, kab razduć šumichu i stvaryć pieradumovy, padstava dla dadatkovaha cisku na zakonnyja siryjskija ŭłady», — adznačyŭ Uładzimir Pucin.
Administracyja prezidenta ZŠA Donalda Trampa ŭskłała adkaznaść za chimičnuju ataku na režym Asada, nazvaŭšy dziejańni ŭradavych vojskaŭ «ahidnymi». Pres-sakratar Biełaha doma Šon Spajsier zajaviŭ u aŭtorak, što ZŠA pracujuć nad vyśviatleńniem abstavin zdareńnia, adnak amierykanskaja administracyja bačyć u hetym śled dziejańniaŭ siryjskaha režymu.
Aficyjny Damask užyvańnie chimičnaj zbroi admaŭlaje.
U rassakrečanaj častcy dakładu Biełaha doma, apublikavanaj hazietaj The New York Times 12 krasavika, častkovaja adkaznaść za toje, što adbyłosia ŭ Chan-Šejchunie, uskładajecca na Maskvu. U dakładzie pakazana, što Maskva «pakryvaje» vinavatych u chimičnaj atacy ŭ Siryi, a taksama imkniecca zabłytać i adciahnuć suśvietnuju supolnaść ad rasśledavańnia prymianieńnia chimičnaj zbroi.
U Kramli abvinavačvańni datyčnaści Rasii da chimičnaj ataki ŭ Siryi nazvali «infarmacyjnaj čachardoj». Pa słovach Piaskova, «u suviazi z usimi hetymi hałasłoŭnymi abvinavačvańniami vielmi šmat supiarečlivaj infarmacyi», i ŭ Kramli nie razumiejuć, adkul idzie takaja infarmacyja.
