Načalnik «Sputnika», nataryus, mieniedžar «Biełtelekama»: kim stali byłyja pres-sakratary KDB
«Naša niva» pisała historyju nataryusa, jakuju špitalizavali praz prablemy ź psichikaj. Adzin z prysutnych na miescy padziej rabiŭ sprobu pieraškodzić pracy žurnalista.
Jak vyjaviłasia, heta byŭ Artur Strech — były pres-sakratar KDB, jaki zajmaŭ pasadu da pryznačeńnia Dźmitryja Pabiaržyna.
Jak vynikaje ź infarmacyi na sajcie Biełaruskaj nataryjalnaj pałaty, ciapier Strech zajmaje tam pasadu pamočnika staršyni i, adnačasova, adkaznaha pa suviaziach z hramadskaściu.
Artur Strech.
Taksama jon niabłaha hulaje ŭ nastolny chakiej na mižnarodnych turnirach nataryusaŭ.
Jak skłalisia losy raniejšych pres-sakrataroŭ śpiecsłužby?
Jašče adzin były pres-sakratar Alaksandr Bazanaŭ paśpieŭ pabyć kiraŭnikom Infarmacyjna-analityčnaha centry pry Administracyi prezidenta, a ciapier «kaardynuje rabotu pa ŭzajemadzieńni z orhanami dziaržaŭnaha kiravańnia» u «Biełtelekamie», a taksama adkazvaje za stvareńnie stanoŭčaha imidža hetaha pradpryjemstva.
Alaksandr Bazanaŭ.
Ale kali vyšejpieraličanyja byłyja KDBisty zajmajuć nie vielmi publičnyja pasady, to adzin ź ich eks-kaleh, Andrej Kačura, pajšoŭ u žurnalistyku.
Paśla pracy ŭ pres-hrupie ŭpraŭleńnia KDB pa Minsku i Minskaj vobłaści jon uznačaliŭ karespandencki punkt telekanała «Rasija» ŭ Minsku. A ciapier zajmaje post kiraŭnika biełaruskaj słužby rasijskaha infarmacyjnaha ahienctva «Sputnik» i pieryjadyčna viadzie tam ułasnyja pieradačy.
