Vital Kličko acaniŭ biełaruskija traktary i prakaciŭsia za rulom aŭtobusa MAZ
Biełarusy prezientavali ŭ Kijevie svaju techniku. Ukrainskaja stalica jakraz źbirajecca abjavić tender na zakupku mašyn dla haradskich kamunalnych słužbaŭ. Biełaruskija traktary i aŭtobusy pratestavaŭ asabista mer Kijeva Vital Kličko, a pradstaviŭ jamu pradukcyju biełaruskaj pramysłovaści vice-premjer Uładzimir Siamaška. Padrabiaznaści paviedamlaje Tut.by sa spasyłkaj na sajt MTZ.
Tut i nižej fota: belarus-tractor.com
Ukraincam pakazali niekalki biełaruskich traktaroŭ z naviasnym abstalavańniem, jakija pryznačanyja dla haradskoj i darožnaj haspadarki. Mera Vitala Kličko zaprasili da traktara BELARUS-622, toj zavioŭ mašynu i zastaŭsia zadavoleny.
Zatym jon pasiadzieŭ u «kabinie padvyšanaj kamfortnaści» univiersalnaha pahruzčyka AMKADOR 342C4 sa ščotkami.
— Mahu skazać, što ŭ kabinie — ja ž nie maleńki taki, 2 mietry rostam — vielmi zručna. I vielmi dobry ahlad, pazityŭnyja ŭražańni. Na maju dumku i pavodle acenak ekśpiertaŭ, heta adpaviadaje sučasnaj technicy, — padzialiŭsia ŭražańniami Kličko.
Zatym kiraŭnik Kijeva prakaciŭ prysutnych na aŭtobusie vytvorčaści MAZ.
Videa z YouTube-kanała partyi «UDAR» Vitala Kličko:
Pa słovach palityka, letaś ukrainskaja stalica zakupiła 50 biełaruskich aŭtobusaŭ. A taksama 30 traktaroŭ, jakija dobra čyścili darohi zimoj ad śniehu i «bieź jakich-niebudź zbojaŭ». Chutka meryja Kijeva abvieścić novyja tendery na pastaŭku kamunalnaj techniki, i, pa słovach Kličko, u biełarusaŭ jość usie šancy vyjhrać ich.
Miarkujučy pa fota na sajcie MTZ, paśla ekskursii mer Kijeva atrymaŭ u jakaści suvienira maleńkuju kopiju biełaruskaha traktara.
Padčas prezientacyi Vitala Kličko supravadžaŭ vice-premjer urada Biełarusi Uładzimir Siamaška, jaki pryjechaŭ u Kijeŭ na pieramovy.
«Naš tavaraabarot raście. Biełaruskim pradpryjemstvam treba prabivacca na ŭkrainski rynak: pakazvać techniku i demanstravać jaje ŭ pracy. Našy pieravahi — cana, nadziejnaść i jakaść», — pryvodzić MTZ słovy Uładzimira Siamaški.
Vice-premjer padkreśliŭ, što staŭku treba rabić nie tolki na Kijeŭ, ale i na inšyja bujnyja harady Ukrainy.
Nahadajem, ukrainski bok tradycyjna kuplaje haradskuju techniku ŭ biełarusaŭ. Pra heta raskazvali ŭkrainskija čynoŭniki padčas letašniaha vizitu ŭ Minsk.
«Kijeŭ papaŭniaje park śpiecyjalizavanaj kamunalnaj techniki ŭ asnoŭnym za košt biełaruskaha aŭtaprama. Ale ŭ supracoŭnictvie my chočam iści dalej: vyvučyć dośvied pa absłuhoŭvańni daroh, zialonaj haspadarki, dobraŭparadkavańni horada», — raspavioŭ padčas vizitu ŭ minskuju meryju ŭ krasaviku 2016-ha namieśnik mera Kijeva Piotr Pancialejeŭ, jaki kuryravaŭ śfieru ŽKH.
