Siryju abvinavacili ŭ chimičnaj atacy, z-za jakoj zahinuli 72 čałavieki. Maskva abaraniaje Damask
EPA
Na dośvitku 4 krasavika ŭ siryjskaj pravincyi Idlib adbyŭsia avijanalot, paśla jakoha dziasiatki miascovych žycharoŭ zahinuli ź simptomami chimičnaha atručvańnia. Pravaabaroncy i suśvietnaja supolnaść abvinavacili siryjski režym va ŭžyvańni atrutnaha hazu padčas bambardziroŭki. Rasija vystupiła ŭ abaronu Damaska, patłumačyŭšy toje, što zdaryłasia, trapleńniem snaradaŭ u skład chimzbroi bajevikoŭ.
Napad na horad Chan-Šejchun adbyŭsia ranicaj 4 krasavika, kali miascovyja žychary jašče spali. Daktary, jakija prybyli dla pošuku paranienych ad vybuchaŭ, ubačyli na vulicach ludziej, što zadychalisia. U paciarpiełych byli zvužanyja zrenki, išła piena z rota, ich vanitavała. Pavodle apošnich źviestak pravaabaroncaŭ, zahinuli 72 čałavieki, u tym liku 20 dziaciej.
Miarkujecca, što suprać horada ŭžyli zaryn abo chłor. Pra heta zajaviŭ pradstaŭnik miascovych daktaroŭ. Vidavočcy raspaviali, što bomby z hazam mahli skinuć siryjskija źniščalniki-bambaviki Su-22. Minabarony Siryi ŭžo adprečyła lubuju datyčnaść da hetaha abo luboha inšaha napadu z užyvańniem chimičnaj zbroi.
Rasija prapanavała svaju traktoŭku padziej, abvinavaciŭšy terarystaŭ u zachoŭvańni chimzbroi ŭ Chan-Šejchunie. Pa viersii Minabarony RF, siryjskija vojski nanieśli ŭdar pa składzie bajevikoŭ, dzie znachodzilisia atrutnyja rečyvy. Adnak u zajavie Maskvy jość adrazu dźvie niestykoŭki. Pa-pieršaje, pradstaŭnik viedamstva Ihar Kanašenkaŭ pakazvaje čas ataki — 11:30 ranicy; vidavočcy ž kažuć, što ŭdary nanieśli na dośvitku, u 06:30. Pa-druhoje, jak adznačaje były aficer brytanskaha adździeła chimabarony Chemiš de Bretan-Hordan, bambavańnie źniščyła b zaryn, kali b jon sapraŭdy zachoŭvaŭsia na składach.
Mižnarodnaja supolnaść ŭskłali vinu za ataku na aficyjny Damask. Z takimi zajavami vystupili prezident ZŠA Donald Tramp, staršynia Rady ES Donald Tusk i hienieralny sakratar NATA Jens Stołtenbierh. Prezident Francyi Fransua Aland nazvaŭ heta «vajennym złačynstvam», a Papa Francišak — «nieprymalnaj bojniaj». Ataku ŭžo paraŭnoŭvajuć z užyvańniem chimzbroi ŭ pryharadzie Damaska 2013 hodzie, kali zahinuli bolš za 1400 hramadzianskich, u tym liku sotni dziaciej.
Rada Biaśpieki AAN 5 krasavika razhledzić rezalucyju pa napadzie ŭ Idlibie. Tekst skłali ZŠA, Vialikabrytanija i Francyja; dakumient asudžaje napad i zaklikaje režym prezidenta Siryi Bašara Asada pradstavić usie dadzienyja pra paloty. U Maskvie ŭžo nieaficyjna zajavili, što vystupiać suprać takoj rezalucyi.