Biełaruski MZS nazvaŭ dziejańni siłavikoŭ 25 sakavika «absalutna adekvatnymi»
U aficyjnym kamientary pres-sakratar MZS Dźmitryj Mirončyk adznačyŭ, što prava hramadzian na mirnyja schody i volnaje vykazvańnie mierkavańnia zamacavana ŭ Kanstytucyi našaj krainy.
«Adnak klučavoje słova tut — «mirnyja». Kali ž da miesca mierapryjemstvy padvoziać «kaktejli Mołatava», padhaniajuć aŭtamabili z zbrojaj, padklučajuć anarchistaŭ, to nazvać takuju akcyju «mirnaj» jazyk nie pavaročvajecca», — skazaŭ Dźmitryj Mirončyk.
Pavodle jaho słoŭ, va ŭmovach narastańnia i pašyreńnia hieahrafii terarystyčnaj pahrozy uładam važna być asabliva pilnymi, dziejničać na apiaredžańnie, a nie «razhrabać» nastupstvy potym.
«Mienavita taki ŭrok my vyniali ź niadaŭnich terarystyčnych aktaŭ u Łondanie, Bierlinie, Paryžy, Brusieli, Nicy. Mienavita hetym kiravalisia biełaruskija ŭłady 25 sakavika. Hałoŭnaj zadačaj było zabiaśpiečyć biaśpieku hramadzian i nie dapuścić krovapralićcia, asabliva z ulikam najaŭnaj infarmacyi pra pravakacyi, jakija rychtavalisia», - vykazaŭ aficyjnuju pazicyju MZS pres-sakratar.
Dziejańni siłavikoŭ u dačynieńni da demanstrantaŭ jon nazvaŭ «absalutna adekvatnymi». A jeŭrapiejskim palitykam paraiŭ źviarnuć uvahu na pracu svaich pravaachoŭnych orhanaŭ padčas razhonu masavych demanstracyj.
«Učorašniaja akcyja mieła niesankcyjanavany charaktar. Udzieł u niesankcyjanavanych akcyjach ciahnie kankretnyja nastupstvy ŭ luboj krainie śvietu. I što «niejeŭrapiejskaha» zmahli razhledzieć u dziejańniach našych pravaachoŭnych orhanaŭ zachodnija palityki? U Minsku razhaniali demanstrantaŭ vadamiotami? Moža być, raspylali haz? Nie. I, dziakuj Bohu, abyjšłosia biez achviar», — skazaŭ Dźmitryj Mirončyk.
Ministerstva zamiežnych spraŭ nie ličyć padziei Dnia Voli padstavaj dla spynieńnia dyjałohu pamiž Biełaruśsiu i krainami Zachadu.
