KDB «nie maje nijakich źviestak» pra toje, dzie Statkievič
Treci dzień svajaki i paplečniki Mikoły Statkieviča ničoha nia viedajuć pra miesca jahonaha znachodžańnia. Maryna Adamovič, žonka palityka, sprabavała vyśvietlić heta ŭ milicyi i KDB, ale marna. 27 sakavika jana źbirajecca padavać zajavu ab źniknieńni čałavieka.
Siońnia pradstaŭnik Kamitetu dziaržaŭnaj biaśpieki Dźmitry Pabiaržyn skazaŭ Svabodzie, što viedamstva nia maje nijakich źviestak pra toje, dzie ciapier moža być Statkievič.
Napiaredadni telekanał STB pakazaŭ siužet, u jakim supracoŭniki KDB atrymali aperatyŭnuju infarmacyju ab pravakacyi, jakaja nibyta rychtavałasia ŭ Miensku padčas akcyi na Dzień Voli.
«Pad aperatyŭnaje nazirańnie trapiŭ pryparkavany 23 sakavika na stajancy ŭ rajonie Akademii navuk lehkavy aŭtamabil. Užo ŭstanoŭleny čałaviek, jaki pryhnaŭ mašynu na hetaje miesca. Heta 32-hadovy žychar Miensku Siarhiej Kuncevič», — pieradaje STB.
U aŭtamabili jak byccam znojdzienyja «hukaŭzmacnialnaja aparatura, pravady, mikrafon i kardonnyja karobki ź dziasiatkami butelek, napoŭnienych vadkaściu z pacham haručaj sumiesi i z knotam z anučaŭ. Jak vyśvietlena, Kuncevič — prychilnik Biełaruskaha nacyjanalnaha kanhresu, inicyjataram jakoha jość Statkievič».
Maryna Adamovič udakładniła, što Siarhiej Kuncevič — siabra arhkamitetu BSDP NH (Biełaruskaj sacyjał-demakratyčnaj partyi «Narodnaja hramada»), ale nikoli nia byŭ kiroŭcam Statkieviča.
