Lidary ES padpisali Rymskuju dekłaracyju
U stalicy Italii padčas samitu Jeŭrasajuza z nahody 60-hodździa Rymskaj damovy padpisanaja Rymskaja dekłaracyja — dakumient, jaki padvodzić vyniki 60 hadoŭ jeŭrapiejskaj intehracyi, a taksama prezientuje płany na raźvićcio Jeŭrapiejskaha sajuza ŭ budučyni. Pra heta paviedamlaje Radyjo Polšča.
Džozef Muškat, premjer Malty, jakaja staršynstvuje ciapier u ES, adznačyŭ:
«Jeŭrasajuz u budučyni pavinien adlustroŭvać situacyju ŭ asobnych jaho krainach, nie ihnarujučy hłabalnyja ŭmovy. Našaj samaj vialikaj słabaściu źjaŭlajecca praces ukaranieńnia pryniatych rašeńniaŭ. My pavinny skancentravacca na tym, kab pryniaćcie rašeńniaŭ było bolš prostym i efiektyŭnym».
U dekłaracyi padkreślivajecca, što ES źjaŭlajecca «niepadzielenym i niepadzielnym», a lidary krain-siabroŭ buduć sumiesna «u zaležnaści ad nieabchodnaści z roznaj chutkaściu i z roznym vysiłkam» dziejničać, imknučysia ŭ adnym kirunku, jak i raniej. Adznačajecca taksama, što Jeŭropa nie budzie admaŭlać tym, chto zachoča dałučycca da supolnaści ŭ budučyni. «Adzinstva Jeŭrasajuza źjaŭlajecca nieabchodnaściu i svabodnym vybaram», — paznačana ŭ dakumiencie.
U toj ža čas u dekłaracyi adlustravanaja prahrama dziejańniaŭ, jakaja składajecca z čatyroch metaŭ: pieršaja — biaśpiečnaja i ŭpeŭnienaja Jeŭropa, druhaja — zamožnaja Jeŭropa, jakaja ŭstojliva raźvivajecca. Treciaja — sacyjalnaja Jeŭropa. I čaćviortaja — umacavańnie pazicyi na mižnarodnaj arenie.
U zaklučnaj častcy dekłaracyi ŭvaha źviernutaja na nieabchodnaść nabližeńnia Jeŭrasajuza da svaich hramadzian. «Jeŭropa — heta naša ahulnaja budučynia», — takimi słovami zaviaršajecca dakumient.
