Ekśpierty pra zajavy Łukašenki: «Heta ŭžo štości pa-za miežami»
Padčas sustrečy z pracoŭnymi kalektyvami pradpryjemstvaŭ kampanii «Kronaspan» Alaksandr Łukašenka zajaviŭ, što ŭ Biełarusi zatrymanyja bajeviki sa zbrojaj, jakija rychtavali pravakacyi.
«Treniravalisia ŭ łahierach sa zbrojaj. Darečy, adzin z łahieraŭ byŭ u rajonie Babrujska i Asipovičaŭ. Astatnija łahiery — va Ukrainie, pa-mojmu, u Litvie ci ŭ Polščy (nie budu śćviardžać, ale niedzie tam), — skazaŭ Alaksandr Łukašenka. — Hrošy išli praz Polšču i Litvu da nas».
«Naša Niva» paprasiła ekśpiertaŭ u śfiery biaśpieki prakamientavać hetyja słovy kiraŭnika dziaržavy.
Adzin z apytanych, Alaksandr Alesin, nazvaŭ imaviernaść isnavańnia takich łahieraŭ u Biełarusi «davoli ekzatyčnaj».
«Tut mohuć vydavać adno za druhoje, — miarkuje Alesin. — Nieadnarazova hučała, što pradstaŭniki biełaruskaj nacyjanalna-aryjentavanaj moładzi pravodziać treniroŭki, kab baranić krainu ad imaviernaha ahresara, pieradusim z uschodu [havorka pra «Vajar» — NN]. Heta takaja «Zarnica». Mahčyma, mienavita hetyja treniroŭki i byli vydadzienyja za niejkija łahiery».
Alesin skazaŭ, što historyja pakazała — u biełaruskich lasach doŭhi čas mohuć aŭtanomna znachodzicca roznyja vajenizavanyja farmavańni, ale kab heta było siońnia, kali ŭsie schilnyja da radykalizmu hrupoŭki pad kantrolem śpiecsłužbaŭ — to takija zajavy nie vyklikajuć vialikaha davieru.
Kiraŭnik analityčnaha prajekta Belarus Security Blog Andrej Parotnikaŭ nie vyklučaje, što niekaha «pad Babrujskam» mahli i «ŭziać».
«Moža, tam byli niejkija strajkbalisty ci rekanstruktary. Pahladzim jašče, kaho jany nam pakažuć, — skazaŭ Parotnikaŭ. — Ale pry čym tut łahiery ŭ Litvie i Polščy? Paśla siońniašnich zajavaŭ biełaruskim dypłamatam budzie vielmi składana niešta patłumačyć u Vilni, Varšavie i Kijevie. Heta ŭžo štości pa-za miežami. Łukašenku paniesła. A paniesła tamu, što jon spužaŭsia. Chto ŭ hetyja bajki pavieryć? U niejkich bajevikoŭ, jakija praryvajucca z aŭtamatami. Tryźnieńnie. Bolš ja kamientavać ničoha nie budu, bo takija zajavy — heta profil inšych śpiecyjalistaŭ».
Analityk Arsień Sivicki vykazaŭ dumku, što infarmacyja pra nibyta najaŭnaść na terytoryi Biełarusi vajenizavanych łahieraŭ, jakija spansujucca krainami Jeŭropy — heta prajava dziejnaści rasijskich śpiecsłužbaŭ u siłavym błoku Biełarusi.
«Sprava ŭ tym, što niekatoraja častka śpiecsłužbaŭ padsoŭvaje Łukašenku dezynfarmacyju, što nibyta niejkija siły sprabujuć tut padarvać stabilnaść, i što jany kormiacca na Zachadzie. Najpierš, što datyčyć infarmacyi pra sami łahiery pad Babrujskaj i Asipovičami, dzie poŭna vajennych baz, to heta epic fail (vialiki pravał) dla ŭsich biełaruskich śpiecsłužbaŭ, kali ŭjavić, što hetaja fantastyčnaja historyja — praŭda. Kaniečnie, možna ŭjavić situacyju, što ŭ zmahańni za biudžety MUS padsoŭvaje prezidentu infarmacyju, jakaja kampramietuje KDB, ale ŭsie hetyja fejkavyja «praryvy» praź biełaruskuju hranicu z boku Ukrainy — heta akurat rasijski pohlad na padziei va Ukrainie, heta pa ich telebačańni «ŭkrainskija bajeviki» pieryjadyčna «robiać sproby» prarvacca to ŭ Rasiju, to ŭ Krym. Heta retranśluje rasijski pohlad na padziei va Ukrainie. Ja liču ŭsiu hetuju isteryju sprobaj Rasii praz svaich ahientaŭ upłyvu pasvaryć našyja krainy — Biełaruś i Ukrainu, Biełaruś i Polšču, Biełaruś i Litvu, padarvać pamiž nami davier i spynić praces narmalizacyi adnosin. Bo, biezumoŭna, ź ich boku budzie niejkaja reakcyja na zajavy ab isnavańni na ich terytoryi baz bajavikoŭ, jakija chočuć tut u nas zładzić niejkija pravakacyi sa zbrojaj u rukach».
