Pra pieršuju žanočuju kamandu pa amierykanskim futbole
«Minskija anioły» — tak budzie zvacca žanočaja kamanda, jakuju trenirujuć chłopcy z «Litvinaŭ».
Apošnija ŭžo bolš šaści hadoŭ pracujuć u stalicy i nie raz stanavilisia pryziorami mižnarodnych spabornictvaŭ. Pieršaja kamanda pa amierykanskim futbole źjaviłasia ŭ Biełarusi ŭ 1989 h. i zvałasia «Minskija drakony». Što da žanočaha pačatku hetaha vidu sportu, to śvietu jon znajomy z 1920-ch. Svaje kamandy chutka źjavilisia nie tolki ŭ Amierycy, ale i ŭ Vialikabrytanii, Rasii i navat Šviecyi. Ciapier takaja budzie i ŭ našaj krainie. Jak jašče adzin dokaz taho, što futboł — nie tolki mužčynskaja hulnia. I zmahajucca tut pa-sapraŭdnamu, biez vyklučeńniaŭ i soplaŭ.
«NN» pahutaryła ź niekalkimi ŭdzielnicami «Minskich aniołaŭ» i vyśvietliła, čamu jany pryjšli ŭ hety sport i pra što marać.
Alaksandra Sajapina, prahramist:
— Da kamandy dałučyłasia ŭ śniežni. Nie pavierycie, ale da hetaha času ja amal nie zajmałasia sportam. A voś nazirać za roznymi spabornictvami lubiła. Jak tolki ŭbačyła abviestku, što ŭ nas stvarajecca žanočaja kamanda, adrazu zachacieła pasprabavać. Pryjšłosia adkinuć dumki pra toje, što ŭ mianie nie atrymajecca, što ja budu samaj marudnaj, pierasilić usio heta i pryjści na pieršuju treniroŭku. Ja zakachałasia ŭ hety vid sportu! Dziakujučy jamu, stała bolš chutkaj, vynoślivaj i, što jašče bolš važna, znajšła novych siabrovak. U nas vielmi kłasnaja atmaśfiera. Niekatoryja dumajuć, što amierykanski futboł vielmi traŭmaniebiaśpiečny, ale za ŭvieś čas ja nažyła tolki huzaki, i toje, praz ułasnuju nieaściarožnaść.
Hałoŭnaje adroźnieńnie mužčynskich kamand ad žanočych, na moj pohlad, u tym, što pieršyja zanadta napružvajucca, kancentrujucca na vynikach, a my prosta dajom vychad emocyjam, časam — nazapašanaj ahresii, i tamu zaŭsiody vychodzim z trenirovak z uśmieškami.
U budučyni mnie chaciełasia b mieć mahčymaść spaborničać ź dziaŭčatami ź inšych krain.
Nastaśsia Dabravolskaja, supracoŭnica MNS:
— Ź dziacinstva ja zajmałasia handbołam. Kali maja kamanda razvaliłasia, treba było znoŭ šukać siabie. Usio pačałosia z taho, što ja zaŭzieła za «Litvinaŭ». Hod tamu vyrašyła pryjści ź imi patreniravacca. Adnojčy chłopcy prosta prapanavali stvaryć žanočuju kamandu.
Ciapier volnaha času paśla pracy i trenirovak amal nie zastajecca, ale heta toje, što mnie padabajecca: tut šmat adrenalinu. Pastajanny ruch, jaki začaroŭvaje.
Vieranika Jaźnievič, sabakarka:
— Ubačyŭšy hulniu žyŭcom pieršy raz, ja zaharełasia: padbiehła da trenieraŭ «Litvinaŭ» i paprasiłasia na treniroŭki, a chutka ŭžo maliła ich stvaryć žanočuju kamandu. U vyniku ja ŭ temie amal čatyry hady. Kaniešnie, kali kazać pra niejki bolš-mienš surjozny ŭzrovień, to heta tolki apošni hod. Mnie pašancavała: aproč zvyčajnych trenirovak, ja mieła mahčymaść dadatkova zajmacca pobač z domam, dziakujučy mužu majoj siastry, jaki taksama žyŭ amierykanskim futbołam.
Heta nie prosta sport, heta intelektualnaje spabornictva.
I nievierahodny vykid adrenalinu. Dla mianie futboł — heta vielmi surjozna, bieź jaho ja ŭžo nie zmahu.
Viktoryja Navickaja, budučy juryst:
— Čamu mianie heta zaciahnuła? Pa-pieršaje, heta vielmi niezvyčajna dla našaj krainy. Pa-druhoje, pa natury vielmi bajavaja, i tut heta znachodzić karysnaje prymianieńnie. Ty možaš być luboj kamplekcyi i fizičnych dadzienych i zajmacca hetym. U nas usich vielmi rozny ŭzrost, ad 18 da 33 hadoŭ, ale heta nie važna. My — kamanda i siabroŭki pa-za treniroŭkami.
Mirasłava Ocinava, markietołah:
— Ja nikoli nie siabravała sa sportam, bolš cikaviłasia mastactvam. Spartovuju zału i basiejn naviedvała, kali tolki natchnieńnie było. Abjava pra nabor na amierykanski futboł mnie spadabałasia tym, što nie patrabavałasia nijakich śpiecyjalnych dadzienych ci padrychtoŭki. Paśla pieršaj treniroŭki mnie padavałasia, što ŭ mianie navat skura balić, było ciažka chadzić, adnak chutka ja ŭciahnułasia, i ciapier čakaju novych sustreč.
Tut ja atrymała svojeasablivy šturšok, asensavańnie: ty ŭsio možaš. Akramia hetaha, zaniatki vielmi badziorać i dyscyplinujuć. Cieła padciahvajecca, a častka niehatyŭnaj enierhii vychodzić u pazityŭnaje rečyšča.
Chutka na «NN» — videa z trenirovak «Minskich aniołaŭ». Nie prapuścicie!
