77-hadovamu invalidu, jaki vyjšaŭ na Marš niedarmajedaŭ, źbirajuć hrošy na pratez
Pinčuk Mikałaj Kryčko, invalid, u jakoha niama nahi, vyjšaŭ na akcyju pratestu ŭ svaim horadzie 11 sakavika.
«Ja 14 hadoŭ chadžu na adnoj nazie, nie mahu kupić prateza. 6 miljonaŭ kaštavaŭ raniej, zatym staŭ 10 miljonaŭ, potym jašče bolš. Nie mahu sabrać. Piensija ŭ mianie maleńkaja, - raspavioŭ 77-hadovy mužčyna žurnalistam «Radyjo Svaboda». -
Mnie pratezy vydajucca kožnyja dva hady. Ale ja mahu chadzić ź imi 15 chvilin, paśla pačynajecca mocny bol. Akramia hetaha, apošnim časam u mianie abvastryŭsia tak zvany «fantomny bol». Tamu ŭźnikła nieabchodnaść nabyć lohki i jakasny pratez, jaki b źmienšyŭ maje pakuty.
Ja vyrašyŭ pajechać u Minsk, kab zrabić impartny pratez. Jon ažno ŭ try razy lahčejšy za naš, našmat bolš zručny. I košt, jaki mnie ahučyli, — heta šeść miljonaŭ tady jašče niedenaminavanych rubloŭ.
Adna sprava — zrabić pratez, a voś paźniej jašče ž pracedury: stacyjanar, treba navučycca chadzić z hetym pratezam. Ja pačaŭ źbirać hrošy, i kali ŭžo mieŭ nieabchodnuju sumu na rukach, iznoŭ pajechaŭ u Minsk. Zachodžu da ŭrača, a tam mnie kažuć, što košt prateza vyras i ciapier składaje 10 miljonaŭ. Dobra, ja pačaŭ źbirać dalej. Praz dva hady, kali mieŭ na rukach hetyja hrošy, košt prateza składaŭ 18 miljonaŭ.
Mianie ŭziała takaja kryŭda, takaja złość zakipieła ŭnutry. Tamu ja paličyŭ abaviazkam pryjści na mitynh i vykazać svaju niazhodu z tym, što adbyvajecca ŭ krainie. Jak ža tak, ja źbiraju hrošy na pratez i nie mahu sabrać? I ja maju prava vykazać svaju dumku».
Dapamahčy mužčynu zaklikaŭ homielski pravaabaronca Leanid Sudalenka. Jon ža i padzialiŭsia rachunkam Mikałaja Kryčko, na jaki možna pieravieści hrošy.
Rekvizity: AAT «ASB Biełarusbank», adździaleńnie №121 / 134 u h. Pinsku.
r / s 000092 (dabračynny rachunak)
Atrymalnik: Kryčko Mikałaj Trafimavič.
