Žycharka Bresckaha rajona tolki ŭ sudzie daviedałasia, što jaje dzicia — nie ad muža
Žycharka Bresckaha rajona tolki ŭ sudzie daviedałasia, što baćkam jaje dziciaci źjaŭlajecca nie były muž, a inšy mužčyna.
Pra heta paviedamiŭ aficyjny pradstaŭnik upraŭleńnia Dziaržaŭnaha kamiteta sudovych ekśpiertyz pa Bresckaj vobłaści Taćciana Sivickaja.
Historyja nie sastupaje siužetu brazilskaha sieryjała. U sud źviarnułasia 35-hadovaja žančyna, spadziejučysia atrymać ad eks-muža alimienty na vychavańnie dziciaci. U apošnija hady jon pierastaŭ udzielničać u vychavańni syna i finansava padtrymlivać jaho. Mužčyna nie mieŭ stałaj pracy, jaho dachody składali tolki vypadkovyja zarobki. Byłaja žonka nastojvała, što hrošy na vypłaty ŭ jaho jość. U svaju čarhu adkazčyk staraŭsia adciahnuć praces vypłaty alimientaŭ, i tamu zajaviŭ u sudzie, što nie źjaŭlajecca baćkam dziciaci, choć nikolki ŭ hetym nie sumniavaŭsia. Dla vyrašeńnia sprečnaha pytańnia była pryznačana sudova-hienietyčnaja ekśpiertyza.
Žychar Bresckaha rajona dumaŭ, što paśla DNK-testu ŭ jaho nie budzie arhumientaŭ dla admaŭleńnia baćkoŭstva, i nie pryjšoŭ na sudovaje pasiedžańnie. Adnak vyniki ekśpiertyzy ździvili žančynu — baćkoŭstva byłoha muža vyklučana. Takim čynam, mužčyna byŭ vyzvaleny ad utrymańnia niepaŭnaletniaha dziciaci.
«Pytańnie vypłaty alimientaŭ źjaŭlajecca adnoj z asnoŭnych pryčyn zvarotu hramadzian pa praviadzieńnie hienietyčnaj ekśpiertyzy. Jak pakazvaje praktyka, u apošni čas, kab paźbiehnuć siamiejnych prablemaŭ, niaŭpeŭnienyja ŭ svaim baćkoŭstvie mužčyny źviartajucca pa vyśviatleńnie baćkoŭstva samastojna, padajučy ŭ adździeł sudova-bijałahičnych i sudova-hienietyčnych ekśpiertyz bijałahičny materyjał (naprykład, uzory śliny)», — adznačyła Taćciana Sivickaja.
U minułym hodzie ŭ kiravańni HKSE pa Bresckaj vobłaści praviedziena 261 ekśpiertyza. Z pačatku 2017-ha zroblena 60 DNK-testaŭ.