Pradstaŭnik Polščy: «Nie budziem kuplać elektraenierhiju ŭ Astraŭcy. Kropka»
Polšča nie budzie kuplać elektraenierhiju ź Biełaruskaj AES. Pra heta zajaviŭ žurnalistam upaŭnavažany polskaha ŭrada pa pytańniach stratehičnaj enierhietyčnaj infrastruktury Piotr Naimski, piša vydańnie BiznesAlert.pl.
- Nie budziem kuplać elektraenierhiju ŭ Astraŭcy. Kropka. Kampanija PSE (Polskija elektrasietki) prystupić da razborki linii elektrapieradačy Biełastok - Roś, - skazaŭ jon.
Adna z pryčyn - «desinchranizacyja enierhietyčnych sistem» krain Bałtyi, Biełarusi i Rasii.
Naimski taksama skazaŭ, što Polšča padtrymlivaje pratest Litvy ŭ dačynieńni da budaŭnictva BiełAES. «Kali elektrastancyja budzie pabudavana, to jana pavinna adpaviadać usim standartam biaśpieki i achovy navakolnaha asiarodździa», - padkreśliŭ jon.
Vosieńniu 2016 hoda premjer-ministr Andrej Kabiakoŭ prapanoŭvaŭ Polščy supracoŭnictva ŭ pytańniach pastavak elektraenierhii z budučaj AES. «Polski bok moh by skarystacca hetaj elektraenierhijaj abo tranzitavać jaje dalej, u Jeŭrapiejski sajuz, - skazaŭ kiraŭnik biełaruskaha ŭrada. - Va ŭsiakim vypadku, hetaja tema aktyŭna ŭ svoj čas vyvučałasia, i ja dumaju, jana maje pierśpiektyvu».
Nahadajem, Litva, jakaja vystupaje praciŭnikam budaŭnictva BiełAES, zaklikała susiednija dziaržavy nie kuplać elektraenierhiju ŭ Astraŭcy. Litoŭski ministr enierhietyki Rokas Masiulis źviarnuŭsia da ministraŭ Łatvii, Estonii, Polščy i Finlandyi z prapanovaj abmierkavać pytańnie kupli elektraenierhii u trecich krain, jakija budujuć niebiaśpiečnyja AES.
U lutym hetaha hoda namieśnik ministra enierhietyki Biełarusi Vadzim Zakreŭski zajaviŭ, što ŭ Jeŭrasajuzie «jość palityčny składnik, błakiroŭka pakul prysutničaje». «Jany, viadoma, bajacca, što chłynie tudy tannaja rasijskaja elektraenierhija», - skazaŭ jon (cytata pa RIA «Naviny»).
Čynoŭnik ličyć, što techničnyja mahčymaści ekspartu elektraenierhii ŭ Polšču jość u astraŭnym režymie, «ale, pa-dobramu, treba rabić ŭstaŭku pastajannaha toku i vyznačać niejki abjom, ale jon pavinien być ekanamična abhruntavany, heta značyć toj bok pavinien razumieć, što treba zaklučać niejki doŭhaterminovy kantrakt, kab my mahli ŭstaŭku akupić. «Ale ŭ nas zadača pabudavać ustaŭku pastajannaha toku na terytoryi Polščy, nie na našaj, kab u nas ažyćciaŭlaŭsia ekspart elektraenierhii ŭ Jeŭropu», - skazaŭ Zakreŭski.
ŁEP «Roś - Biełastok» napruhaj 220 kv była pabudavana ŭ 1962 hodzie i pracavała da 1994 hoda. U 2000-2005 hodzie jaje zadziejničała dla tranzitu rasijskaje RAT «JEES Rasiei». U siaredzinie 2000-ch hadoŭ «Biełenierha» viało pieramovy z PSE na pastaŭku elektraenierhii ź Biarozaŭskaj HRES «Biełenierha». Tady ž Biełaruś aficyjna nakiroŭvała ŭ Jeŭrakamisiju prapanovu pa stvareńni elektraenierhietyčnaha transpartnaha kalca ź ES, ale pa roznych pryčynach jamu nie byŭ dadzieny chod.
Biełaruskaja AES uzvodzicca pobač z Astraŭcom, za 50 kiłamietraŭ ad Vilniusa. Kredyt dla budaŭnictva vydzieliła Rasija. Stancyja budzie składacca z dvuch enierhabłokaŭ sumarnaj elektryčnaj mahutnaściu da 2400 MVt. Uvod u ekspłuatacyju pieršaha błoka zapłanavany na 2019 h., druhoha - da 2020.
