Jak zvyčajnaja siamja Brylonkaŭ naładziła vypusk najsmačniejšaha biełaruskaha łasunku VIDEA
Kali nie viedajecie, čym takim biełaruskim ździvić zamiežnaha hościa, to prezientujcie jamu ziefir, zhuščonku ci žuraviny ŭ cukry. Hetyja takija zvykłyja dla nas pradukty dla žycharoŭ inšych krain sapraŭdnaje adkryćcio.
Niezvyčajnyja kisła-sałodkija draže — padarunak Hłyboččyny. Bolšaść jahad, schavanych pad cukram, sabranyja miascovymi žycharami na najbližejšych bałotach. Dy i samo pradpryjemstva «Aržanica», jakoje nadaje žuravinam niepaŭtorny smak, mieścicca ŭ Hłybokim i naležyć miascovaj siamji Brylonkaŭ.
«Aržanica» źjaviłasia 25 hadoŭ tamu, ale ŭ toj čas vypuskała nie žuraviny ŭ cukry, a roznaje charčovaje abstalavańnie. Pieršy pakunak jahad tut vyrabili tolki praz čatyry hady, dy i toje, chutčej, vypadkova. Vyrašyŭšy pasprabavać siabie ŭ charčovaj pramysłovaści, Brylonki stali aktyŭna raspradavać abstalavańnie, jakoje na toj momant zastavałasia. I amal usio prystroili, akramia adnoj linii dla vytvorčaści žuravin u cukry. Voś tady hłybockaja siamja i vyrašyła ŭziacca za vyrab słavutaha prysmaku i zajmajecca hetym užo 20 hadoŭ.
Jak vyrablajuć žuraviny ŭ cukry
Linija pa vytvorčaści žuravin u cukry pracuje zvyčajna dva-try razy na tydzień, usio zaležyć ad zamoŭ. Za dzień tut mohuć vyrabić da 600 kiłahram draže.
Choć žuraviny pastupajuć na liniju ŭžo adsartavanyja, ich jašče raz uručnuju pierabirajuć, kab nie trapilisia paškodžanyja, niedaśpiełyja ci pieraśpiełyja jahady.
Dalej ich pakryvajuć klejstaram, admysłovym klejem, pryhatavanym z muki abo kruchmału, kab dobra braŭsia cukar.
Prajšoŭšy «cukrovy tunel», žuraviny ŭručnuju abkatvajucca ŭ cukrovaj pudry i ŭ vyniku traplajuć u łatok.
Fasujuć jahady na admysłovaj mašynie, a voś upakoŭki dla ich źbirajuć uručnuju. Ciaham dnia žančyny mohuć skłaści ad troch da piaci tysiač pakunkaŭ.
«Samaje hałoŭnaje i samaje składanaje ŭ našaj pracy — zachavać syravinu. Bačycie, jak vyhladajuć žuraviny? — kaža dyrektar firmy Anatol Brylonak i zakidvaje ŭ rot niekalki śviežych jahad. — Kali žuraviny dobraj jakaści, značyć, dobraj budzie i pradukcyja».
U admysłovym schoviščy da 20 ton śviežych jahad mohuć lažać ceły hod. Tut im stvarajuć amal tyja ž umovy, što i na bałocie, tamu jany nie hublajuć ni svoj naturalny vyhlad, ni smak.
«Užo druhi hod my pracujem bieź pierapynkaŭ, bo vyrašyli pytańnie zachavańnia žuravin. Dahetul pracavali maksimum da červienia, — zaznačaje spadar Anatol. — Maj zvyčajna jašče pracavali, a potym pačynałasia śpioka i treba było terminova zakruhlacca. Letam nie było mahčymaści mieć syravinu dobraj jakaści. U 2015 hodzie my vyrašyli hetuju prablemu i 2016 hod adpracavali całkam. Na pieršy pohlad, vytvorčaść prostaja, ale tut šmat niuansaŭ. Ni ŭ koha nie atrymałasia, siońnia my adziny vytvorca nie tolki ŭ Biełarusi, ale faktyčna va ŭsioj Jeŭropie».
Anatol Brylonak
Žuraviny na «Aržanicy» vykarystoŭvajuć biełaruskija, sabranyja pieravažna na Hłyboččynie.
«U nas jość śpiecyjalnaja mašyna UAZ, na jakoj my vyjazdžajem na bałoty. Ludzi viedajuć, i tam ža adrazu pradajuć nam sabranyja jahady, — kaža spadar Anatol. — U siezon my zakuplajem da 30 ton dzikarosłych žuravin. I jašče niekalki ton nabyvajem na admysłovych płantacyjach. Biarom asabliva bujnyja hatunki, jany daražejšyja, i my ź ich robim nabory cukierak z roznymi absypkami».
Ciapier na pradpryjemstvie vypuskajuć 16 roznych praduktaŭ: žuraviny ŭ samych roznych varyjacyjach, sočyva, marmieład.
«My pačynali z prostych žuravin u cukry, — pryhadvaje žonka spadara Anatola Nina Brylonak, jakaja pracuje ŭ «Aržanicy» namieśnikam dyrektara. — Potym stali dadavać cynamon, kakava-parašok, šakaład, roznyja absypki. Spačatku pasprabavali arachis-kakos, pabačyli, što ludziam spadabałasia. Tady dadali daražejšuju absypku — mindal i funduk».
Nina Brylonak pracuje ŭ muža namieśnicaj.
Pradpryjemstva «Aržanica» zusim nievialikaje, tut pracujuć usiaho 24 čałavieki. Ciaham miesiaca kamanda vyrablaje čatyry tony dobra znajomych usim pakunkaŭ z žuravinami. 80% ź ich paśla nakiroŭvajuć u stalicu, častka jedzie ŭ Rasiju, a ciapier dyrektar firmy Anatol Brylonak prakładaje šlach i ŭ Jeŭropu.
«Amal hod daviałosia pracavać nad tym, kab žuraviny atrymali dazvoł na prava ŭvozu ŭ jeŭrazonu, i siońnia heta tak, — kaža spadar Anatol. — Budziem źbirać valutu, jana nie zhubić u inflacyi. Rynki treba mieć. Chto nie budzie ekspartavać pradukcyju, u taho budzie vartaje žalu isnavańnie. Nas mienš za dziesiać miljonaŭ, my nie možam źjeści ŭsio toje, što vyrablajem. Usio heta treba kudyści vyvozić, kamuści pradavać. U tym liku i našu pradukcyju».
Anatol i Nina Brylonki pačali rychtavać sabie źmienu. Ich mienšy syn Vasil apošnija niekalki hadoŭ pastupova pahłyblajecca ŭ siamiejny biznes i musić stać pierajemnikam.
«A tam, hladziš, i ŭnuki pierachopiać, — kaža spadar Anatol. — U mianie try ŭnuki i try ŭnučki, i ŭsie jany vielmi lubiać našy žuraviny. Sam ja jahady jem mała. Časam pryjdzieš u cech, treba pradehustavać, pravieryć, u jakim stanie žuraviny. Heta abaviazak. Chočaš nie chočaš, a davodzicca. Za vytvorčaściu treba sačyć, čym bolš ludziej praviarajuć, tym lepš. Kaštuju žuraviny amal kožny dzień, ale jany mnie nie nadakučyli».
Spadar Anatol hanarycca tym, što ich žuraviny — całkam naturalny pradukt, u jakim niama nijakich sintetyčnych dadatkaŭ.
I choć sabie jahady ŭ cukry, u ich usio adno šmat karysnaha. Apošnim časam Brylonki ŭzialisia jašče i za hramadskuju aśvietu — stvaryli hramadskaje abjadnańnie «Klukvačy» i zaachvočvajuć ludziej bierahčy našu pryrodu.
