Kiraŭnik Jeŭrapiejskaj narodnaj partyi zapatrabavaŭ vyzvaleńnia aryštavanych biełaruskich palitykaŭ
Lidar kirujučaj frakcyi Jeŭraparłamienta Žozef Dol zaniepakojeny žorstkimi aryštami ŭ Biełarusi apazicyjnych palitykaŭ i patrabuje nieadkładnaha ich vyzvaleńnia. Pra heta palityk napisaŭ 11 sakavika ŭ svaim tvitary, paviedamlaje tut.by.
Žozef Dol. Fota: Alaksandr Vasiukovič, TUT.BY
«Biełaruś pavinna vykonvać mižnarodnyja zakony, pavažać asnoŭnyja pravy čałavieka: svabodu słova i schodaŭ, terminova vyzvalić pravacentrysckich lidaraŭ», — napisaŭ jon.
Nahadajem, u Maładziečnie prajšli sudy nad zatrymanymi paśla «Maršu niedarmajedaŭ», jaki adbyŭsia 10 sakavika ŭ horadzie, aktyvistami apazicyi. Lidar ruchu «Za Svabodu» Juryj Hubarevič, lidar AHP Anatol Labiedźka i sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski aryštavanyja na 15 sutak pa abvinavačvańni ŭ arhanizacyi maršu «Ja nie darmajed». Volha Kavalkova atrymała 7 sutak administracyjnaha aryštu, Aleś Abramovič i aktyvist AHP Dzianis Krasačka aštrafavanyja na 50 bazavych vieličyniaŭ kožny.
Žozef Dol, lidar adnoj z najbujniejšych partyj Jeŭropy, napiaredadni parłamienckich vybaraŭ u 2016 hodzie pryjazdžaŭ u Biełaruś, dzie sustrakaŭsia z pradstaŭnikom Administracyi prezidenta, namieśnik kiraŭnika MZS, lidarami apazycyi, aktyvistami hramadzianskaj supolnaści i naviedaŭ pikiet pravacentrysckaj kaalicyi.
Jeŭrapiejskaja narodnaja partyja — pravacentrysckaja ahulnajeŭrapiejskaja palityčnaja partyja, jakaja pradstaŭlenaja va ŭsich palityčnych instytutach ES. Partyja isnuje bolš za 40 hadoŭ i składajecca z chryścijanska-demakratyčnych i kansiervatyŭnych partyj krain Jeŭropy.
