10 hadoŭ kałonii za «kiravańnie niezarehistravanymi arhanizacyjami» — ahučyli prysudy minskim antyfa
10 sakavika ŭ sudzie Pieršamajskaha rajona Minska skončyŭsia praces pa tak zvanaj «spravie antyfašystaŭ». Sudździa faktyčna zadavoliŭ patrabavańni prakurora.
Takim čynam, samaje žorstkaje pakarańnie atrymali dvoje chłopcaŭ, jakija abvinavačvajucca jašče i ŭ niezakonnym abarocie narkotykaŭ — Arciom Kraŭčanka i Vadzim Čartovič. Ich asudzili na 12 hadoŭ strohaha režymu kožnaha.
Na 10 hadoŭ kałonii strohaha režymu asudžany Illa Vałavik — chłopiec, jakoha, akramia chulihanstva, vinavaciać u kiraŭnictvie šeraham niezarehistravanych arhanizacyj (fanackich supołak).
Pryznali vinavatymi ŭ złosnym chulihanstvie i dali pa 4 hady Filipu Ivanovu i Vadzimu Bojku. Dźmitryja Ciechanoviča asudzili na 6 hadoŭ ahulnaha režymu.
Ciechanovič i Ivanoŭ, jakija znachodzilisia na voli padčas pracesu, byli ŭziatyja pa vartu ŭ zali suda.
Sutyčka pamiž prychilnikami dvuch minskich futbolnych kłubaŭ — «pravymi» fanatami «Tarpieda» i «antyfašystami», što zaŭziejuć za «Partyzan» — adbyłasia jašče 29 červienia 2014 hoda. Tady dźvie hrupy fanataŭ pabilisia na prypynku na vulicy Nieścierava. Paśla jany pabilisia jašče ŭ tralejbusie.
10 lipienia 2014 hoda ŭ dačynieńni da 10 čałaviek byli zaviedzienyja kryminalnyja spravy za chulihanstva. Škoda tralejbusnamu parku skłała 280 tysiač «starymi», paciarpiełych siarod pasažyraŭ nie było. Nieŭzabavie ŭsich zatrymanych vypuścili, spravu prypynili.
Ale ŭ 2016 paśla pracy milicyjantaŭ z zatrymanymi za narkotyki Čartovičam i Kraŭčankam sprava była adnoŭlenaja, u minskich antyfašystaŭ prajšoŭ šerah vobšukaŭ. Zatrymali Vałavika, Bojku, Ciechanoviča i Ivanova (apošnich dvuch paźniej adpuścili z-pad varty).
