Urad Polščy abnaŭlaje zakon ab repatryjantach
Polski ŭrad siońnia pracuje nad papraŭkami da Zakona ab repatryjantach, jaki daje novaje vyznačeńnie repatryjanta i praduhledžvaje zasnavańnie pasady ŭpaŭnavažanaha ŭrada pa spravach repatryjacyi, paviedamlaje Radyjo Polšča.
«Dadzieny zakon pavinien ablehčyć i paskoryć repatryjantam viartańnie ŭ Polšču», — skazaŭ pres-sakratar urada Rafał Bachenek.
Rafał Bachenek padkreśliŭ, što heta realizacyja partyjaj «Prava i spraviadlivaść» dadzienaha na vybarach abiacańnia ab jurydyčnym padmurku stvareńnia adaptacyjnych centraŭ dla repatryjantaŭ. Da ich stvareńnia buduć pryciahnutyja roznyja ŭstanovy i hramadskija arhanizacyi.
Funkcyi ŭpaŭnavažanaha ŭrada pa spravach repatryjacyi buduć uskładzienyja na namieśnika ministra ŭnutranych spraŭ i administracyi. Pa słovach kiraŭnika ŭradavaj pres-słužby, u jaho zadačy budzie ŭvachodzić kaardynacyja supracoŭnictva ŭrada i miascovych orhanaŭ samakiravańnia ŭ halinie repatryjacyi:
«Upaŭnavažany taksama budzie prymać rašeńni ab raźmierkavańni miescaŭ u adaptacyjnych centrach dla repatryjantaŭ i finansavaj dapamohi. Havorka idzie ab vypłacie adnarazovaj dapamohi — tak zvanych «padjomnych» na bytavyja vydatki i pražyvańnie».
Novaje vyznačeńnie repatryjanta daść mahčymaść atrymańnia polskaha hramadzianstva mužam/žonkam asob, achoplenych prahramaj repatryjacyi. Da hetaha času muž/žonka inšaj nacyjanalnaści atrymlivaŭ tolki dazvoł na pastajannaje miescažycharstva ŭ Polščy.
