Historyk: milicyja śviatkuje stahodździe z pamyłkaj na 13 dzion
Piša historyk Anatol Sidarevič.
Dziŭnaja kraina Biełaruś! Jašče nie była abvieščana Biełaruskaja Narodnaja Respublika, jašče balšaviki ani nie dumali pra Sacyjalistyčnuju Savieckuju Respubliku Biełarusi, a biełaruskaje vojska ŭžo było.
I abaraniaje jano našu Ajčynu 99 hadoŭ. Znoŭ ža, kali Biełaruś była raspałaviniena, kali na ŭschodzie ad Smalenska da Dźviny, Dniapra i Saža ŭładu trymali kamisary Zachodniaj vobłaści, kali na zachadzie ad Horadna da Mahilova stvaralisia i dziejničali struktury BNR, źjavilisia biełaruskija pamiežnyja vojski. Treba dumać, jany achoŭvali miežy z Łatvijaj, Litvoj i Ukrainaj, dzie dysłakavalisia niamieckija i aŭstra-vienhierskija vojski, a na ŭschod ad Smalenska — miažu z balšavickaj Rasijaj.
Jašče mudrej u nas z vojskami inžyniernymi.
Mienavita tak: nie inžyniernymi častkami, nie ź inžyniernymi padraździaleńniami, a z vojskami.
Jašče nichto navat nie dumaŭ pra Biełaruś jak palityčnuju katehoryju, jašče isnavała Reč Paspalitaja Abodvuch Narodaŭ, jašče na jaje pasadzie siadzieŭ Aŭhust Dužy, a asobnyja biełaruskija inžyniernyja vojski ŭžo byli. I stvaryŭ ich, dajcie viery, maskoŭski car Piotr. Voś tolki ni adny mudrec ź Ministerstva abarony nie skaža vam, u jakich haradach Biełarusi znachodzilisia kazarmy tych vojskaŭ, dzie byŭ ich štab i chto imi kamandavaŭ.
U mudrahielstvie, jakoje možna nazvać biezhałoŭjem, ad vajskovych nie adstaje milicyja.
Niechta ź milicejskich hienierałaŭ niedzie pračytaŭ, što milicyja ŭ Miensku arhanizavana 4 sakavika 1917 hoda. I ŭ hety dzień vyrašyli zrabić sabie śviata.
Musić, kiepskija nastaŭniki historyi byli ŭ tych milicejskich mudracoŭ. Ale ž jość u MUS svaja akademija, i tam, viedaju, jość dobryja historyki dziaržavy i prava. Jany mahli b padkazać milicejskim hienierałam, što
4 sakavika 1917 hoda — heta 17 sakavika 1918-ha i nastupnych hadoŭ XX i XXI stahodździaŭ, što mienavita ŭ hety dzień našym milicyjantam treba śviatkavać.
Dla paraŭnańnia: balšaviki zachapili ŭładu 25 kastryčnika 1917 hoda, ale ciapier hety dzień adznačajecca 7 listapada.
Pra toje, što milicyju ŭ Minsku pačali arhanizoŭvać 17 sakavika 1917 hoda, napisana i ŭ «Ilustravanaj chranałohii historyi Biełarusi», jakuju vydaviectva «Biełaruskaja Encykłapiedyja» vypuściła jašče ŭ 1995 hodzie. Ale ž milicyjanty, jak vyhladaje, takija knihi nie čytajuć.
Možna pačuć, što naš Dzień milicyi — z balšavickim prysmakam, bo pieršym načalnikam minskaj milicyi ŭ 1917 hodzie byŭ Michaił Frunze. Chaciełasia b nahadać našym antykamunistam, što milicyju ŭ Minsku stvarali demakraty, demakratyčnyja arhanizacyi, a nie balšaviki. Toje, što na čale jaje staŭ Frunze, — vypadkovaść.
Da taho ž balšavki 4 sakavika 1917-ha (nazaŭtra paśla padzieńnia dynastyi Ramanavych) jašče i nie dumali pra zachop ŭłady. 4 sakavika Lenin u Ciurychu taksama nie pačaŭ tryźnić uładaj. Jon jašče nijak nie moh ačomacca i pavieryć, što Vialikaja revalucyja ŭ Rasii pieramahła. Biez kirujučaj i nakiroŭvajučaj roli balšavikoŭ.
