Kreml admoviŭsia ad śviatkavańnia «dnia dałučeńnia Kryma» ŭ centry Maskvy
Tradycyjny mitynh-kancert u centry Maskvy z nahody dałučeńnia Kryma sioleta albo projdzie ŭ inšym miescy i farmacie, albo nie projdzie naohuł. Surazmoŭcy Doždia tłumačać heta zališnim «aficyjozam» mierapryjemstvaŭ u minułyja hady, pierahružanaściu centra horada i žadańniem novaha kiraŭnictva ŭnutrypalityčnaha błoku admaŭlacca ad starych farmataŭ.
Administracyja prezidenta Rasii vyrašyła admovicca ad farmatu śviatkavańnia dnia «dałučeńnia Kryma» da Rasii. Pra heta Doždiu raspaviali na ŭmovach ananimnaści kramloŭski čynoŭnik, čałaviek, blizki da meryi Maskvy, i surazmoŭca, blizki da kiraŭnictva Dziarždumy.
Śviatkavańnie tradycyjna prachodzić 18 sakavika — u hety dzień byŭ padpisany dahavor ab «pryniaćci» paŭvostrava ŭ skład Rasii. U toj ža dzień na Krasnaj płoščy prajšoŭ mitynh-kancert pad nazvaj «My razam!». Tam sabralisia kala 110 tys. čałaviek, pierad imi akramia papularnych śpievakoŭ i palitykaŭ vystupiŭ prezident Rasii Uładzimir Pucin.
Hety farmat paŭtarali i ŭ nastupnyja dva hady: la ścien Kramla źbiralisia kala 100 tys. čałaviek, pierad imi taksama vystupaŭ Pucin. U minułym hodzie jon asabista nie naviedvaŭ mitynh, ale źviazaŭsia z udzielnikami pa videasuviazi z Kryma, kudy pajechaŭ prainśpiektavać budaŭnictva Kierčanskaha mosta.
U hetym hodzie vyrašana, što taki farmat sastareŭ — nielha ŭvieś čas paŭtarać adno i toje ž, kaža kramloŭski čynoŭnik. Jon pryznaŭ, što na mitynhi takoha maštabu davodziłasia zhaniać biudžetnikaŭ i heta stvarała ŭražańnie zališniaj «zaarhanizavanaści». Surazmoŭca, blizkaja da meryi, kaža, što z-za mitynhu davodziłasia pierakryvać centr, što pieraškadžała inšym maskvičam.
Čałaviek, blizki da dumskaha kiraŭnictva, kaža, što farmat śviatkavańnia vyrašyła źmianić novaja kamanda ŭnutrypalityčnaha błoka Kramla — z vosieni jaho kuryruje pieršy namieśnik kiraŭnika administracyi prezidenta Siarhiej Kiryjenka, jaki pierajšoŭ na pasadu zamiest śpikiera Dziarždumy Viačasłava Vałodzina. Novaja kamanda choča pracavać pa-svojmu i nie paŭtarać papiarednikaŭ, kaža surazmoŭca.
