Na placoŭcy Talaka.by pačaŭsia zbor hrošaj na druhuju knihu Jaryły Pšaničnaha
Paet Jaryła Pšaničny nie paśpieŭ vydać pry žyćci svaju druhuju knihu, tamu heta vyrašyli zrabić jahonyja siabry, jakija raspačali na hramadzianskaj płatformie Talaka.by zbor hrošaj dla vydańnia viasiołaj, vostrasacyjalnaj i bahata ilustravanaj knihi «Atamnaja łučyna».
Jaryła Pšaničny (sapr. Uładzimir Bańko; (1.11.1973 — 19.04.2015) — adzin ź jarkich pradstaŭnikoŭ biełaruskaha paetyčnaha, muzyčnaha i mastackaha andehraŭndu, udzielnik hurtoŭ i prajektaŭ «Cage», «Karaoke Vomit», «Baradaty Hrynvič», «Flowervill», «Lucky Luck», «Buślik suprać Kaduka», «Roomdark», «Racyjanalnaja dyjeta», «Generation Skweee», «Kniaź Myškin», pierformier-hrup «Teatr psichičnaje nieŭraŭnavažanaści» i «Śpiecbryhada afrykanskich bratoŭ». Nieadnarazova ŭdzielničaŭ u mastackich vystavach, afarmleńni knih i časopisaŭ.
U litaratury Jaryła Pšaničny nabyŭ viadomaść najpierš tym, što asnoŭnaj pracoŭnaj movaj svajoj tvorčaści zrabiŭ «trasianku», jak časam iranizujuć — «treciuju dziaržaŭnuju movu Respubliki Biełaruś». Naturalna, hetaja źjava znachodzicca pa-za miežami litaraturnaj normy, a voś Jaryła Pšaničny ŭziaŭ iśviadoma ŭvioŭ jaje ŭ litaraturny ŭžytak. Satyryčnyja, iraničnyja i niea-sacartaŭskija vieršy na «trasiancy» jon spačatku drukavaŭ u anarchisckaj haziecie «Navinki», a paźniej, u 2011 hodzie, vydaŭ knihu pad nazvaj «Piščavyja liški», unikalnuju ŭ kantekście sučasnaj biełaruskaj litaratury.
«Atamnaja łučyna» — druhaja, paśmiarotnaja kniha Jaryły Pšaničnaha. Jana našmat abjomniejšaja za pieršuju, azdoblenaja hrafičnymi pracami aŭtara i fotazdymkami. Nazvu knizie dała adnajmiennaja paema, nad jakoj Jaryła Pšaničny pracavaŭ na praciahu 2010 — 2011 hh. Heta satyryčny vodhuk paeta na
ekałahičnyja prablemy sučasnaści, stylizavanaja pad falkłor i fantastyku historyja pra toje, jak «Janka maryŭ stać atamščykam. Jaho abraziŭ Niačyścik Djabła, kab skraści vialiki biełaruski sakret, nakiravaŭ u budučyniu i ažaniŭ». Iranizujučy i z hałoŭnaha hieroja, i ź nievierahodnych situacyj, u jakija jon traplaŭ, u epiłohu Jaryła Pšaničny paŭstaje najbolš udumlivym i surjoznym, a jaho ironija nabyvaje zusim «čornaje» adcieńnie: «Spačatku narod / Kremirujem / A potym djabła/ Premirujem». Razhladajučy jašče papiaredniuju knihu Jaryły Pšaničnaha, krytyki zaznačali: «Tak, błazienstva i surjoznaść, biazdumnaja radaść i horki smutak — u žyćci zusim pobač stajać, i majuć ułaścivaść vokamhnienna transfarmavacca adno ŭ adno» (Michaś Južyk, «Teksty», 2012, № 2).
Akramia paemy, u knihu ŭvajšli vieršy Jaryły Pšaničnaha, jakija pisalisia z 2000 pa 2015 hod i ŭ papiaredni zbornik nie ŭvajšli. Jany taksama zbolšaha praciahvajuć satyryčna-iraničny kirunak, zadadzieny ŭ pieršaj knizie. Paet, vierny svajmu anarchisckamu ampłua, praciahvaje ściabać i biełarusaŭ i zamiežnikaŭ, i ŭładu i apazicyju, i hopnikaŭ i intelihiencyju, i siabie asabista, i, pa vialikim rachunku, samu paeziju — kali, paradzirujučy zaštampavanaść pryjomaŭ mastackaj vobraznaści, aŭtar źviartajecca da treš-estetyki kštałtu «Sonca hradusam kałocić / Kułakom pa hałavie». I mahčyma, pa vieršach Jaryły Pšaničnaha kali-niebudź buduć vyvučać našuju historyju — jak pa hetkim zajmalnym navučalnym dapamožniku…
Ukłaŭ knihu paet i litaraturaznaviec Viktar Žybul, a vydać jaje źbirajecca vydaviectva «Halijafy».
Kniha budzie vydadziena abjomam bolš za 360 staronak na krejdavanaj papiery, u ćviordaj vokładcy, ź vialikaj kolkaściu ilustracyj, fotazdymkaŭ ź pierformansaŭ i litaraturnych vystupaŭ.
Mierkavany nakład — 300 asobnikaŭ.
Kniha budzie vydadziena abjomam bolš za 360 staronak u ćviordaj vokładcy ź vialikaj kolkaściu ilustracyj, fotazdymkaŭ ź pierfomiensaŭ i litaraturnych vystupaŭ. Mierkavany nakład — 300 asobnikaŭ.
Padtrymać prajekt
