«Zabojca ź bienzapiłoj» praviadzie za kratami 15 hadoŭ
Fota Ułada Šviadoviča
3 sakavika byŭ abvieščany prysud pa spravie Ułada Kazakieviča, 18-hadovaha chłopca, jaki pryjšoŭ ź bienzapiłoj i siakieraj u handlovy centr i zabiŭ tam žančynu.
Prakuror Aleh Bujlankoŭ prasiŭ dla Ułada maksimalnaje pakarańnie — 15 hadoŭ pazbaŭleńnia voli ŭ kałonii ahulnaha režymu. Bolš chłopcu dać nie mohuć, bo padčas ździajśnieńnia złačynstva jon byŭ niepaŭnahadovym. 18 hadoŭ spoŭniłasia Kazakieviču, kali jon byŭ užo pad vartaj. Tamu pažyćciovaje ci rasstreł chłopcu nie pahražała.
Fota Siarhieja Hudzilina
Sudździa Piotr Arłoŭ asudziŭ Kazakieviča na 15 hadoŭ hadoŭ kałonii ahulnaha režymu.
Prysud jašče nie ŭstupiŭ u zakonnuju siłu i moža być abskardžany
Muž zahinułaj pradavački Alaksandr Aleksandroniec:
«Prysud spraviadlivy, abjektyŭny pa zakonie pravilny — jon ža ździejśniŭ złačynstva niepaŭnahadovym.. A što mała dajuć za takoje… U zakonie jość prabieły, nad jakimi deputatam treba padumać».
Taksama sud vyrašyŭ, što Kazakievič pavinien spłacić paciarpiełym amal 200 tysiač rubloŭ kampiensacyj
Naprykład, Alaksandr Aleksandroniec, muž zahinułaj pradavački atrymaje 45 tysiač za maralnuju škodu, maci zahinułaj Aleny — 50 tysiač. Hanna Razientava — 1500. Aksana Vitvier, jakoj Kazakievič mocna paškodziŭ ruku — 29 tysiač.
***
Maci Ułada na abviaščeńnie prysudu nie pryjšła. Prysutničaje baćka.
Nahadajem, što Uład Kazakievič 8 kastryčnika 2016 hoda pryjšoŭ u handlovy centr «Novaja Jeŭropa» ź bienzapiłoj i siakieraj. Ekśpiertyza pakazała, što padčas złačynstva chłopiec uśviedamlaŭ, što robić. Śledstva vyśvietliła, što za niekalki dzion pierad zabojstvam u handlovym centry, Uład Kazakievič prychodziŭ ź bienzapiłoj va ŭniviersitet (jon vučyŭsia va ŭniviersitecie MITSO, adkul byŭ adličany). Na ščaście, instrumient prosta nie zavioŭsia.
Ale ž zavioŭsia jon uviečary 8 kastryčnika 2016 hoda, kali Uład napadpitku pryjšoŭ u HC «Novaja Jeŭropa». Jon pasprabavaŭ napaści na žančynu, taja źbiehła, tady chłopiec kinuŭsia na inšuju — dva razy ŭdaryŭ jaje bienzapiłoj. Instrumient zahłuch. Chłopiec dastaŭ z čachła ad hitary siakieru i niekalki razoŭ dabiŭ paranienuju. 43-hadovaja žančyna skanała na miescy. Zatym Kazakievič paraniŭ jašče dźviuch žančyn. Paśla čaho jaho skruciŭ chłopiec-pradaviec.
Svaju vinu Kazakievič pryznaŭ całkam. Na sudzie jon nieadnarazova kazaŭ, što ni ab čym nie škaduje i chacieŭ by zabić bolš ludziej.