Śviatłana Niła: Kab nie pras*ać Biełaruś, idzicie ŭ «Adnakłaśniki»
Post dla palitykaŭ i endeašnikaŭ, dla hramadzianskaj supolnaści. I dla pracaŭnikoŭ ŚMI, napeŭna, taksama.
Učora my sčapilisia z fatohrafam Uładziem Hrydzinym nakont taho, ci byli prarasijskija nastroi na mitynhu ŭ Homieli i ahučvaŭ ich chtoś ci nie. I Uładź mnie dakazaŭ-taki, što tak, była ciotka, jakaja ŭ miehafon padziakavała Uładzimiru Uładzimiraviču za mahčymaść biełarusam pracavać u Rasii. I mnohija z natoŭpu joj plaskali ŭ dałoni. A byli i tyja, chto niaŭchvalna śvistaŭ i hudzieŭ.
Ja razumieju, čamu tak.
Bolšaja častka Homiela i ŭsioj Biełarusi vyžyvaje za košt pracy ŭ Rasii. Asabliva rajony. Dadajcie siudy achop rasijskich ŚMI.
Uładź, zdajecca, ličyć, što ŭsio — kapiec, DNR nam zabiaśpiečany. A ja liču, što jašče nie. I zaraz pasprabuju rastłumačyć čamu.
Niekatoryja ŚMI i partyi niadaŭna adkryli dla siabie «Adnakłaśniki.ru». Ale toje, što adkryła ja dla siabie
tam, u OK, —vielmi važny forum, h.zn. kamienty pad temami. Voś tam vy sustreniecie tak zvany «prosty narod». Ludziej, jakich niekatoryja ŭ nas nazyvajuć prołami.
Publiku, jakaja ŭ bolšaści hałasavała za Łukašenku. Publiku, da jakoj u FB pryvykli stavicca pahardliva i sa śmiecham: usie hetyja Matronuški, durnyja statusy, recepty straŭ z majanezikam i inšaje. Ja sama hetaj pahardlivaściu hrašyła.
Pakul žyćcio nie prymusiła spuścicca ŭ apramietnuju — u kamienty na «Adnakłaśnikach». Ja išła tudy z dryžykami, bo čytačy patrabavali maderacyi tut i nieadkładna.
Išła z dryžykami… a znajšła ludziej tam. Złych, u rospačy, dezynfarmavanych, jakija sprabujuć razabracca ŭ situacyi. A jašče znajšła tam lehijon, nie, lehijonišča, rasijskich trolaŭ. Kolki ja znajšła tam aktyvistaŭ ad biełaruščyny i niezaležnaści? Vielmi i vielmi mała, i jany zusim nie z zorak FB i navin niezaležnych ŚMI.
My kinuli ŭsiu hetuju vielizarnuju publiku (bolš za 2,8 młn) na vodkup «olhincam».
Nie chaču tut vystupać ekśpiertam pa «prostym narodzie». Prosta raju, hruntujučysia na svaim dośviedzie.
Chočacie procidziejničać mahčymym DNRam, idzicie tudy, u OK. Tłumačcie im, spračajciesia ź imi. Idzicie tudy biez efiektu «źjaŭleńnia Chrysta narodu», biez pychi. Pačynajcie rujnavać prapahandysckija mify, pačynajcie tłumačyć, padavać idei, zapytvacca pra ich mierkavańnie.
Mnohija z tych ludziej, što siadziać tam, nie ŭmiejuć karystacca jemejłam abo huhłam. Mnohija ź ich nie ŭjaŭlajuć, što takoje fejk abo infarmacyjnaja biaśpieka. I zaraz takaja situacyja, što ludzi hatovyja słuchać!
Publika ŭ OK bolš emacyjnaja, mienš strymanaja, davierlivaja. Dakazvajučy trolu, što ŭ našaj krainie prablema z padatkam sapraŭdy jość, čałaviek moža vykłaści ŭsiu svaju padnahotnuju: dzie pracavaŭ, što zdaryłasia, dzie pracuje žonka i jakaja ŭ jaje zarpłata i h.d.
Ludzi tam za trolami paŭtarajuć formuły «Biez Rasiei nam kaniec», «Rasija dapamoža skinuć Łukašenku», «Našy tavary nikomu nie patrebnyja ŭ ES» (o! kolki razoŭ ja heta čytała!), «Pamiž Zachadam i Rasiejaj vybirać pryjdziecca», «Lepš Rasija, na Zachadzie pany i teraryzm». Nu i jašče pra «fašyscki» BČB-ściah, mifičny i mahutny BNF, jaki ŭ sajuzie z «amierykosami» ŭviadzie Biełaruś u biezdań vajny.
Bačyš takoje — pačynaješ zadavać pytańni.
A jaki z dvuch BNFaŭ raźviaža vajnu?
A ich što, dva chiba?
Beenefaŭcy-fašysty padbiaruć pad siabie pratest!
A vy ŭ kursie, što BNF nie ŭdzielničaje ŭ pratestach?
Nie moža być, a jak ža beenefaŭskija ściahi?
A jany nie beenefaŭskija. Histaryčnyja, biełaruskija.
Pad imi fašysty vajavali, nikoli nie stanu pad taki ściah!!!
A rasijski trykałor taksama nienavidzicie, pad im ułasaŭcy vajavali?
I voś padčas takich razmovaŭ ludzi vyzvalajucca ad čaraŭ. Pačynajuć dumać, zadavać pytańni. I budźcie ŭpeŭnienyja: vašu razmovu pračytajuć jašče paru dziasiatkaŭ ci socień čałaviek. I paniasuć, što pračytali, na pracu, na bazar, na dvor i da mužčyn na piva.
Kali ŭ dyskusii piersanaž pačynaje manipulavać, pastajanna mianiać temu razmovy, jamu nie treba ničoha tłumačyć — heta trol, u ban.
Pra Rasiju. Adkrytyja najezdy na Rasiju ŭsprymajucca drenna. Mnohija vyžyvajuć za košt Rasii. Inšyja ludzi atrymlivajuć paćvierdžańnie, što voś pryjšoŭ ahient BNF zrynać nas u biezdań vajny za piačeńki Sorasa. Na ŭra zatoje idzie teza: «Usich lubim, z usimi siabrujem, ale ŭ svaich prablemach biełarusy raźbiarucca sami. U nas svaja kraina».
Vysnova. Darahija nieabyjakavyja i lidary, nie žadajecie pras*ać dziaržavu — kali łaska, u vas pad nosam vydatny instrumient, kab pazmahacca za rozumy ludziej. Ukraincy nie paśpieli, Danbas akazaŭsia ŭ infarmacyjnym pałonie Rasii. Kali pačalisia ciahniki družby i inšaje, było ŭžo pozna. Troli i prapahanda zrabili svaju spravu.
U nas ciapier narod zły na Łukašenku jak nikoli, prosta ŭ rospačy — mnohija sapraŭdy vyžyvajuć, hetym mohuć skarystacca niadobrazyčlivyja našaj krainie siły. Nie budzie pracy ź ludźmi, nie budzie hodnych pavodzin lidaraŭ — možam dačakacca vielmi drennych rečaŭ. Kažučy cenzurna.
Padpisacca na akaŭnt NN u «Adnakłaśnikach» možna tut.
