Pad Tałačynom hość «prastaviŭsia» 5 litrami ałkaholu, a paśla zadušyŭ abaich haspadaroŭ
Upraŭleńniem śledčaha kamiteta pa Viciebskaj vobłaści zavieršana rasśledavańnie kryminalnaj spravy ŭ dačynieńni da žychara Tałačynskaha rajona, jaki abvinavačvajecca ŭ ździajśnieńni zabojstva dvuch čałaviek.
Jašče dniom 30 žniŭnia 2016-ha hoda 38-hadovy mužčyna pačaŭ vypivać. Kali viečaram damoviŭsia ab tym, što nabudzie skutar u znajomych, vyrašyŭ adznačyć udałuju ŭhodu. Prychapiŭ z saboj 5-litrovuju kanistru sa śpirtnym, pryjšoŭ u hości da adnaviaskoŭcaŭ.
Dom, u jakim i adbyłosia dvajnoje zabojstva. Fota: sk.gov.by.
Padčas pjanki ŭźnik kanflikt, jaki pieraros u bojku. Źbiŭšy haspadara doma, hość zadušyŭ jaho. Spałochaŭšysia, što haspadynia doma paviedamić u milicyju, zadušyŭ žančynu. Kab schavać ślady złačynstva, pakłaŭ abodva cieły ŭ zału, adkryŭ na kuchni ručki hazavaj plity i vyjšaŭ z chaty. Vykinuŭ svaje słancy ŭ travu ŭ kancy vioski, doma pieraapranuŭsia, schavaŭšy vopratku i remień.
Fota: sk.gov.by.
Ranicaj nastupnaha dnia cieły mužčyny i žančyny znajšli susiedzi.
Zhodna z zaklučeńniem sudova-miedycynskaj ekśpiertyzy, śmierć abaich nastupiła na miescy zdareńnia ad miechaničnaj aśfiksii: mužčyny — u vyniku zadušeńnia rukami, žančyny — z pryčyny zadušeńnia piatloj.
U vyniku praviedzienych apieratyŭna-vyšukovych mierapryjemstvaŭ supracoŭnikami orhanaŭ unutranych spraŭ padazravany byŭ apieratyŭna vyličany i zatrymany.
Śledčyja ahučyli abvinavačańnie žycharu Tałačynskaha rajona pa p. 6 č. 2 art. 139 i p 6, 8, 16 č. 2 art. 139 (zabojstva, ździejśnienaje z asablivaj žorstkaściu, i zabojstva, ździejśnienaje z asablivaj žorstkaściu, z metaj schavać inšaje złačynstva, ździejśnienaje asobaj, jakaja raniej učyniła zabojstva) Kryminalnaha kodeksu Respubliki Biełaruś. Z momantu zatrymańnia abvinavačvany ŭtrymlivajecca pad vartaj.