«ŁNR — siła». Chulihany razmalavali mašynu žonki lidara ipešnikaŭ Anatola Šumčanki
Fota z fejsbuka Anatola Šumčanki
Nieviadomyja razmalavali farbaj mašynu, jakaja naležyć žoncy lidara abjadnańnia pradprymalnikaŭ «Pierśpiektyva» Anatola Šumčanki. Na łabavym škle źjaviŭsia nadpis «ŁNR — siła», a pad ščotkaj łabavoha škła — ksierakopii 50-dalaravych kupiur. Aktyvist źviazvaje chulihanskuju akcyju sa svajoj hramadskaj dziejnaściu i praŭkrainskaj pazicyjaj.
Fota z fejsbuka Anatola Šumčanki
«Mnie patelefanavali znajomyja i skazali, što chtości raśpisaŭ aŭtamabil majoj žonki, — raspavioŭ Šumčanka. — Nadpis «ŁNR — siła» i kopii dalaraŭ pad ščotkaj łabavoha škła jaŭna havorać pra toje, što my majem spravu z hrupaj, jakaja pačynaje zvodzić rachunki z tymi, chto vykazvaje ŭ Biełarusi pazicyju pa zachavańni cełasnaści i niezaležnaści Ukrainy. Heta vielmi tryvožny zvanočak, tamu što siońnia jany razmalavali mašynu, a što zrobiać zaŭtra? Naturalna, heta ŭsio sieparatysckija prajavy».
Šumčanka dadaje, što dastałasia aŭtamabilu jaho žonki, a sam jon jeździć na inšym.
«Adnak, dumaju, heta časova, — skazaŭ pradprymalnik. — Žonka, kaniečnie, uschvalavanaja i napałochanaja».
Šumčanka dadaŭ, što niekalki miesiacaŭ tamu ź im źviazvalisia pradstaŭniki samaabvieščanaj ŁNR i prasili padtrymać miascovych pradprymalnikaŭ.
«Ja adkazaŭ, što padtrymaju ich, kali jany častka Ukrainy, — zaznačyŭ lidar pradprymalnikaŭ. — To bok my budziem pracavać ź imi jak z Ukrainaj, a nie jak z ŁNR, i paśla hetaha ŭsie kantakty spynilisia».
