Dvaccać knih, jakija abaviazkova treba nabyć na Minskim knižnym kirmašy
8 lutaha ŭ budynku «Biełekspa» pačaŭ Minski knižny kirmaš. Bolš za paŭsotniu vydaviectvaŭ pradstaŭlajuć tut svaju pradukcyju. Najlepš pradstaŭlenyja, naturalna, biełaruskija stendy i rasijskija.
«Naša Niva» ŭžo pisała pra antylitaraturu, jakoj taksama navieźli ŭ Minsk. Adnak na kirmašy jość vielmi šmat dobrych knih, jakija pradajucca pa cenach nižejšych, čym zvyčajna ŭ kramach.
«Naša Niva» prapanuje rejtynh samych cikavych vydańniaŭ, što možna znajści na razvałach «Biełekspa».
Śviatłany Aleksijevič, «Čas second-hand», «Cynkavyja chłopčyki» i inšyja
Cana: ad 13 da 15 rubloŭ
Piać knih Nobieleŭskaha łaŭreata pa litaratury 2015 hoda Śviatłany Aleksijevič pradajecca na stendzie rasijskaha vydaviectva «Vriemia». Kupić pa takich cenach knihi piśmieńnicy na siońnia ŭ Minsku niemahčyma. A ŭ subotu 11-ha lutaha a 11 hadzinie naviedniki vystavy zmohuć atrymać aŭtohraf ad samoj łaŭreatki.
Anatol Butevič, «Jak Danik u Radziviłaŭskaje mietro trapiŭ»
Cana: 4,95 rubloŭ
Na stendzie vydaviectva «Mastackaja litaratura» było pradstaŭlena trochu vydańniaŭ na biełaruskaj movie dla dziaciej. Naprykład, kniha byłoha ministra kultury Anatola Buteviča. Kniha napisana ŭ pryhodnickim žanry, maje dobryja ilustracyi. A hałoŭnaja jaje meta — raskazać ab historyi słavutaha mahnackaha roda, pryvić luboŭ da svajoj historyi.
«Radziviły. Niaśviž. Zamak». U 2-ch tamach
Cana: 40 rubloŭ
Pra Radziviłaŭ jość što pačytać nie tolki dzietkam, ale i darosłym. Šykoŭny albom «Radziviły» vydadzieny ź ćviordaj vokładkaj, na miełavanaj papiery, kalarovymi ilustracyjami. Praŭda, na ruskaj, a nie biełaruskaj movie. Heta historyja adnaho z samych upłyvovych dvaroŭ siaredniaviečnaj Jeŭropy.
Alena Cieraškova, «Anhlijskaja mova: słova za słovam. Vieršy»
Cana: 3,5 rubloŭ
Kniha dla samych maleńkich biełarusikaŭ. Aŭtarka ŭ zajmalnaj vieršavanaj formie prapanuje zavučvać anhlijskija słovy. Miarkujecca, što taki padychod budzie efiektyŭnym pa vyvučeńniu jak biełaruskaj, hetak i anhlijskaj. Kniha maje bahata ilustracyj.
Jazep Drazdovič, «Praź cierni da zorak»
Cana: 19 rubloŭ
Absalutna šykoŭnaje 543-chstaronkavaje vydańnie. U knihu, układzienuju litaraturaznaŭcam Michasiom Kazłoŭskim, uvajšli ŭspaminy viadomych ludziej pra jaho. Tut sama litaraturnyja tvory Drazdoviča, jaho dziońnik, a taksama, biezumoŭna, karciny. Mastak Piatro Sierhijevič nazyvaŭ Drazdoviča «biełaruskim da Vinčy». Takuju knihu nikomu nie budzie soramna pastavić na svaju palicu.
Cima Parvieła, «Eła i siabry»
Cana: 10,5 rubloŭ
Pierakład ź finskaj dziciačaj knihi vykanała Alena Kazłova. «Našy piśmieńniki tak nie pišuć. Byvaje adkryješ biełaruskaha aŭtara — i viedaješ, što budzie dalej, a tut da apošniaha trymajecca intryha. I choć ja daŭno vyjšaŭ ź dziciačaha ŭzrostu, ale knihu čytaŭ z zachapleńniem», — tak pradstaviŭ vydańnie paet Viktar Šnip. Na prezientacyju knihi ź Finlandyi pryjechaŭ sam aŭtar.
Ljuis Kerał, «Skroź lusterka i što ŭbačyła tam Alisa»
Cana: 30 rubloŭ
Suśvietna viadomaja knihi Ljuisa Kerała ciapier dastupnaja i pa-biełarusku. U knizie majecca bolš za sotniu aryhinalnych karcin ad mastački Kaciaryny Dubovik. Jany pavinny dapamahčy junym i nie vielmi čytačam razabracca ŭ tym zabłytanym śviecie Zalustroŭja, kudy trapiła Alisa.
Mikałaj Ułaščyk, «Zbor tvoraŭ». Tom 1
Cana: 39 rubloŭ
«Heta najlepšy biełaruski historyk XX stahodździa, nichto ź im nie paraŭnajecca, — tak prezientuje Ułaščyka redaktar časopisa Arche Valeryj Bułhakaŭ. — Adnak paśla śmierci aŭtara nichto tak i nie vydaŭ jaho histaryjahrafičnyja pracy asobnym vydańniem. Vydavałasia bieletrystyka, dziońniki, uspaminy, ale asnoŭnyja jahonyja pracy pa VKŁ, ekanamičnym raźvićci Biełarusi, nie byli dastupnyja ŭ adnym tomie. Naša vydańnie zakryvaje hetuju łakunu».
Knut Hamsun, «Hoład»
Cana: 12,9 rubloŭ
«Heta pieršaja kniha ŭ sieryi «Nobieleŭskija łaŭreaty pa-biełarusku». Upieršyniu Hamsun vychodzić pa-biełarusku, pierakładčykaŭ z narviežskaj adzinki, ekskluziŭnaja praca. Kali kazać sučasnaj movaj, to «Hoład» — heta vielmi chipstarskaja kniha, pra maładoha čałavieka, jaki nie maje hroša, ale choča žyć pryhoža», — havoryć inicyjatar vydańnia Siarhiej Makarevič.
Uładzimir Sadoŭski, «1813»
Cana: 5,9 rubloŭ
Heta pieršy biełaruski zomba-chorar. Viadomy kampazitar i hramadski dziejač Rečy Paspalitaj Michał Kleafas Ahinski pačynaje svajo zmahańnie z paŭstałym mierćviakami. Takoha pazityŭnaha trešaka pa-biełarusku vy jašče nie čytali.
Ludmiła Ulickaja, «Leśvica Jakava»
Cana: 24,5 rubloŭ
Kali źviarnucca da sučasnaj rasijskaj litaratury, to adna z najbolš jarkich zorak siońniašniaha dnia — heta Ludmiła Ulickaja. Daŭniejšy jaje raman «Daniel Štajn, pierakładčyk», jaki napisany ŭ tym liku i na biełaruskim materyjale, staŭ biasprečnym biestseleram. Nie tak daŭno źjaviŭsia čarhovy raman — «Leśvica Jakava». U centry knihi šeść pakaleńniaŭ siamji Asieckich, praź jakich pakazanaja historyja Rasii apošnich 100 hadoŭ. «Leśvicu Jakava» rekamiendujuć i Volski, i Jarmošyna.
Chańja Janahichara, «Maleńkaje žyćcio»
Cana: 22 rubli
Kniha pačynajecca tym, što čaćviora siabroŭ z roznym koleram skury, pryjazdžajuć u Ńju-Jork, kab budavać svajo žyćcio. Heta takaja strašnaja kazka na noč. Raman napisany na ŭzor bujnych tvoraŭ XIX stahodździa.
Patryk Ziuskind, «Parfuma»
Cana: 7 rubloŭ
Hety raman pierakładzieny na paŭsotni movaŭ, ekranizavany ŭ 2006 hodzie. Zahadkavaja historyja Žana-Bacisty Hrenuja pa-raniejšamu pryciahvaje da siabie amataraŭ intelektualnaj litaratury. Čytajučy hetuju knihu vy adčujecie dziasiatki roznych, pryjemnych i nie vielmi, pachaŭ.
Saša Filipienka, «Ckavańnie», «Były syn»
Cana: ad 8 da 11 rubloŭ
«Heta nie prosta modny sučasny aŭtar. Heta aŭtar, jaki piša na surjoznyja, balučyja temy, i robić heta tak zachaplalna, što ab takim drajvie, styli, napory, moža tolki maryć sučasnaja papularnaja litaratura», — pradstaviŭ knihu supracoŭnik vydaviectva «Vriemia» Dźmitryj Hasin. Varta adznačyć, što Filipienka maje biełaruskaje pachodžańnie, choć i žyvie ŭ Rasii, a jaho knihi napisany častkova na biełaruskim materyjale.
Nił Hejman, «Karalina»
Cana: 15 rubloŭ
Jašče adna kniha pa-biełarusku z suśvietnaj kłasiki dla dziaciej. Hrošy na jaje vydańnie źbirali ŭsim śvietam praz kraŭdfandynh. «Karalina» — heta kniha, katoruju chacieŭ by napisać kožny sučasny dziciačy piśmieńnik, ale Nił Hejman usich apiaredziŭ» — adznačaje pierakładčyca knihi Darja Vaškievič.
Ryhor Baradulin, «Pieravybranaje»
Cana: 5 rubloŭ
Prosta ŭsio najlepšaje ad kłasika biełaruskaj litaratury pad adnoj vokładkaj.
Biełaruskaja mova. Samadapamožnik
Cana: 27 rubloŭ
Kniha vydadzienaja ŭ Maskvie i adrasujecca ŭ pieršuju čarhu dla žycharoŭ Rasii. «Dapamožnik dazvalaje vypracavać maŭlenčyja navyki, nieabchodnyja dla znosin i čytańnia nieskładanaj litaratury, i avałodać asnovami hramatyki: uroki dapamožnika znajomiać i z hramatyčnymi asablivaściami movy, i z ahulnaŭžyvalnaj hutarkovaj-bytavoj leksikaj. Asvoiŭšy jaje, možna biez prablem vyjści ź luboj situacyi pry niepasrednych znosinach z žycharami Biełarusi», — havorycca ŭ anatacyi. Dobry padarunak dla siabroŭ z Rasii.
Ryšard Kapuścinski, «Čornaje dreva»
Cana: 19,95 rubloŭ
Knihi vydatnaha polskaha repartažysta ŭžo dastatkova dobra pradstaŭlenyja na biełaruskaj movie. Ciapier źjaviłasia jašče adna — na hety raz pra Afryku. Revalucyi, vojny, pieravaroty, miaściny niezvyčajnaj pryhažości ŭsio heta ŭradženiec Pinska bačyŭ na svaje vočy. Knihi Kapuścinskaha zachaplalnyja i nie banalnyja.
Aleś Razanaŭ, «Majem najbolšaje sami»
Cana: 13,5 rubloŭ
U hod 500-hodździa biełaruskaha knihadrukavańnia kudy biez Franciška Skaryny? Pradmovy da skarynaŭskich knih pierastvaryŭ u paeziju Aleś Razanaŭ.
Błaknoty ad vydaviectva «Papury»
Cana: 2,5 rubli
Cudoŭnyja nievialičkija błaknoty z vyšyvankami, vycinankaj i inšymi biełaruskimi ŭzorami. Kaštujuć zusim niamnoha. Kamuści možna zrabić pryjemny padarunak.
