Raśsielhasnahlad adkłaŭ vizit svaich supracoŭnikaŭ u Biełaruś, aścierahajučysia «pravakacyj»
Raśsielhasnahlad adkłaŭ vizit śpiecyjalistaŭ u Biełaruś z-za aściarohaŭ «pravakacyjnych dziejańniaŭ ź biełaruskaha boku», paviedamiła pres-słužba rasijskaha viedamstva.
«Fiederalnaja słužba pa vieterynarnym i fitasanitarnym nahladzie pryniała rašeńnie ab pieranosie terminaŭ vizitu śpiecyjalistaŭ słužby ŭ Respubliku Biełaruś, jaki byŭ zapłanavany na luty 2017 hoda. Padobnaje rašeńnie Raśsielhasnahlad byŭ vymušany pryniać u suviazi ź isnujučymi aściarohami šerahu inśpiektaraŭ adnosna mahčymych pravakacyjnych dziejańniaŭ ź biełaruskaha boku. Vizit adkładzieny da stabilizacyi situacyi», — havorycca ŭ paviedamleńni.
Pres-słužba adznačaje, što damoŭlenaść ab naviedvańni rasijskimi śpiecyjalistami miescaŭ zachoŭvańnia i vytvorčaści raślinnaj pradukcyi ŭ Biełarusi była dasiahnutaja padčas pieramovaŭ namieśnika kiraŭnika Raśsielhasnahlada Julii Švabaŭskienie z dyrektaram Hałoŭnaj dziaržaŭnaj inśpiekcyja pa nasieńniavodstvie, karancinie i achovie raślin Respubliki Biełaruś Alaksandram Piskunom 7 lutaha. «Zapłanavany vizit pavinien byŭ rastłumačyć situacyju z rezkim pavieličeńniem abjomaŭ pastavak padkarancinnaj pradukcyi ź Biełarusi ŭ Rasiju, a mienavita morkvy ŭ 2,6 razu, jabłykaŭ u 1,5 razu, kapusty piekinskaj ŭ 3,3 razu, hryboŭ u 1,4 razu, cybuli repčataj ŭ 32 razy, bulby charčovaj u 2,2 razu ŭ paraŭnańni z 2015 hodam», — paviedamlaje Raśsielhasnahlad.
***
3 lutaha Alaksandr Łukašenka daručyŭ biełaruskamu MUS razhledzieć pytańnie ab raspačynańni kryminalnaj spravy ŭ dačynieńni da kiraŭnika Raśsielhasnahlada Siarhieja Dankvierta za naniasieńnie škody Biełarusi.
U adkaz na heta Dankviert rekamiendavaŭ navieści paradak na biełaruskich pradpryjemstvach, a z 6 lutaha Rasija abmiežavała pastaŭki jałavičyny i jałavičnych subpraduktaŭ ź Minskaj vobłaści.
7 lutaha MUS Biełarusi paviedamiła pra pačatak daśledčych pravierak u dačynieńni da šerahu słužbovych asobaŭ Raśsielhasnahlada. «Ministerstva ŭnutranych spraŭ maje źviestki ab tym, što asobnyja słužbovyja asoby Fiederalnaj słužby pa vieterynarnym i fitasanitarnym nahladzie RF (Raśsielhasnahlad) u intaresach, nie źviazanych ź ich prafiesijnaj dziejnaściu, biez najaŭnaści dastatkovych padstaŭ i z parušeńniem normaŭ mižnarodnaha prava abmiažoŭvali mahčymaść realizacyi biełaruskaj pradukcyi na terytoryi Rasii, a taksama ažyćciaŭlali raspaŭsiudžvańnie niedakładnaj infarmacyi, jakaja dyskredytuje ajčynnych vytvorcaŭ», — havaryłasia ŭ paviedamleńni MUS.
