Sud prypyniŭ dziejańnie mihracyjnaha ŭkaza Trampa
Fiederalny sud u Sietle (štat Vašynhton) prypyniŭ dziejańnie ŭkazu prezidenta ZŠA Donalda Trampa, u jakim toj rasparadziŭsia spynić pryjom biežancaŭ i vydaču viz hramadzianam siami dziaržaŭ, nasielenych pieravažna musulmanami, piša VVS.
Dziejańnie ŭkaza prypynienaje pa ŭsioj krainie da tych časoŭ, pakul nie budzie razhledžany pazoŭ, padadzieny ŭ hety sud miascovaj prakuraturaj. U pazoŭnaj zajavie jana patrabuje pryznać asnoŭnyja pałažeńni ŭkaza niekanstytucyjnymi i skasavać jaho.
Praź niekalki hadzin stała viadoma, što ministerstva justycyi ZŠA ŭ bližejšy čas asprečyć rašeńnie suda ŭ Sietle.
Prakuror štata Vašynhton Bob Fierhiuson, kamientujučy rašeńnie prypynić dziejańnie ŭkaza, nazvaŭ jaho śviedčańniem pieramohi zakona ŭ ZŠA. Jon dadaŭ, što ciapier ludzi, jakija trapili pad dziejańnie ŭkaza, znoŭ zmohuć źviartacca pa vizy.
Na jaho dumku, ukaz parušaje pałažeńnie amierykanskaj kanstytucyi ab roŭnaści pierad zakonam, prava za svabodu vieravyznańnia, prava na spraviadlivaje sudovaje raźbiralnictva i zakony ab imihracyi.
Pres-słužba Biełaha doma ŭ raspaŭsiudžanaj zajavie nazvała ŭkaz prezidenta pravamiernym i metazhodnym, padkreśliŭšy, što kiraŭnik dziaržavy «maje kanstytucyjnaje prava i abaviazak abaraniać amierykancaŭ».
Raniej stała viadoma, što z momantu vydańnia ŭkaza byli anulavanyja kala 100 tysiač užo vydadzienych amierykanskich viz. U toj ža čas ułady ZŠA adznačajuć, što ŭsie mihranty z pastajannym dazvołam na žycharstva bieśpieraškodna traplajuć u ZŠA.
Ukaz ab spynieńni pryjomu biežancaŭ i vydačy viz hramadzianam siami dziaržaŭ, nasielenych pieravažna musulmanami, byŭ padpisany prezidentam ZŠA Donaldam Trampam 28 studzienia.
Ukazam dla hramadzian Sudana, Jiemiena, Livii, Samali, Iraka, Irana i Siryi uviedzienaja 90-dzionnaja zabarona na ŭjezd u Złučanyja Štaty. Taksama spynieny na niavyznačany termin pryjom siryjskich biežancaŭ. Prahrama pryjomu biežancaŭ ź inšych krain zamarožanaja na 120 dzion.
