Muziej Džordža Łukasa źjavicca ŭ Łos-Andželesie
Stvaralnik kinasahi «Zornyja vojny» Džordž Łukas vyznačyŭsia ź miescam dla budaŭnictva ŭłasnaha muzieja kino, jaki sam režysior vyrašyŭ nazvać Muziejem mastactva apaviadańnia. Budynak muzieja ŭźviaduć u Łos-Andželesie, paviedamlaje VVS.
Muziej futurystyčnaha vyhladu pabudujuć u parkavaj zonie na poŭdni Łos-Andželesa. Fota AR
Pieršapačatkova muziej płanavałasia pabudavać na bierazie voziera Mičyhan u Čykaha, adnak prajekt nie spadabaŭsia miascovym ekałahičnym aktyvistam. Jany arhanizavali masavyja pratesty suprać budaŭnictva, i pad ich ciskam Łukas pahadziŭsia pieranieści muziej u inšy horad.
Paśla hetaha architektary padrychtavali adrazu dźvie kancepcyi muzieja — dla Łos-Andželesa i San-Francyska. U vyniku paśla doŭhaha abmierkavańnia sam Łukas zrabiŭ vybar na karyść Łos-Andželesa. Budynak pabudujuć u parkavaj zonie na poŭdni miehapolisa.
U hetym miescy ŭ 1932-m i 1984 hadach pravodzilisia letnija Alimpijady. Akramia taho, jano raźmieščanak niepadalok ad niekalkich histaryčnych słavutaściaŭ i ad univiersiteta, u kinaškole jakoha Łukas vučyŭsia ŭ 1970-ja hady.
Mer horada Eryk Harseci ŭžo nazvaŭ Łos-Andželes idealnym miescam dla muzieja i pryznaŭsia, što haradskija ŭłady byli vielmi zacikaŭlenyja ŭ atrymańni hetaha prajekta. Finansavać budaŭnictva budzie sam Łukas, i heta budzie kaštavać jamu bolš čym miljard dalaraŭ.
Kancepcyja muzieja praduhledžvaje aktyŭnaje vykarystańnie vizualnych vobrazaŭ. Ekspazicyja budzie ŭklučać mnostva fatahrafij, videarolikaŭ i filmaŭ. Jana budzie naličvać tysiačy pradmietaŭ, adabranych z asabistaj kalekcyi Łukasa.
U muziei vystaviać aryhinalnyja pradmiety, jakija vykarystoŭvalisia ŭ pracesie zdymak nie tolki «Zornych vojnaŭ», ale i inšych lehiendarnych halivudskich filmaŭ, takich jak «Čaraŭnik krainy Oz» abo «Kasabłanka».
Akramia rekvizitu sa zdymačnych placovak, naviedvalnikam pakažuć pracy Renuara i Deha, a taksama amierykanskich mastakoŭ Makśfiłda Peryša i Normana Rokueła. Sam Łukas tłumačyŭ, što choča razmyć u svaim muziei miažu pamiž vysokim mastactvam i masavaj kulturaj.
