U Biełarusi žančyny čaściej achviarujuć hrošy, a mužčyny — padpisvajuć pietycyi
U Biełarusi žančyny čaściej achviarujuć hrošy i dapamahajuć na vałanciorskich pačatkach hramadskim arhanizacyjam, mužčyny — čaściej padpisvajuć pietycyi, śviedčać źviestki daśledavańnia biełaruskaj internet-aŭdytoryi «Daśviedčanaść i dałučanaść da dziejnaści hramadskich arhanizacyj i niefarmalnych inicyjatyŭ u Biełarusi», vyniki jakoha prezientavanyja 9 studzienia ŭ Minsku.
Daśledavańnie pravodziłasia ŭ śniežni 2016 hoda «Ofisam jeŭrapiejskaj ekśpiertyzy i kamunikacyi» ŭ partniorstvie z «Bałtyjskaj inicyjatyvaj internet-palityki» (e-baltic.org).
Pavodle słoŭ kiraŭnika prajekta e-baltic.org Michaiła Daraševiča, u daśledavańni ŭziali ŭdzieł 2.011 respandentaŭ, ź jakich 1.052 (59%) viedajuć ab hramadskich arhanizacyjach i niefarmalnych inicyjatyvach u Biełarusi.
Najbolš viadomymi typami arhanizacyj ŭdzielniki apytańnia nazvali prafsajuznyja (54,3%), maładziožnyja (50,7%), spartyŭnyja (42,6%), sacyjalnyja (39,8%) i relihijnyja (34,4%). Zamykajuć śpis arhanizacyi, jakija zajmajucca pytańniami rehijanalnaha i miascovaha raźvićcia, a taksama navukaj i daśledavańniami.
6,6% apytanych samastojna abo ŭ składzie kamandy realizujuć prajekty i inicyjatyvy, 16,4% — źjaŭlajucca členami hramadskaj arhanizacyi, 48,4% zajavili, što ŭdzielničali ŭ pracy hramadskaj arhanizacyi abo inicyjatyvie.
65% apytanych miarkujuć, što hramadskija arhanizacyi prynosiać karyść biełaruskamu hramadstvu.
Siarod hałoŭnych pryčyn ŭdziełu ŭ pracy hramadskaj arhanizacyi apytanyja nazvali «ahulnyja kaštoŭnaści, cikavyja prajekty i dakładnyja mety».
Najbolš aktyŭna ŭ pracy hramadskich arhanizacyj i inicyjatyŭ udzielničajuć maładyja ludzi ad 15 da 24 hadoŭ. Pry hetym jany čaściej za inšyja ŭzrostavyja hrup pracujuć u jakaści vałancioraŭ.