Zimoŭski: Źmianić Łukašenku na bolš łajalnaha Rasii? Moža, u Kramli i chacieli b, ale chto im daść?
Były staršynia Biełteleradyjokampanii, a siońnia miedyjakansultant z Sankt-Pieciarburha Alaksandr Zimoŭski byŭ u śpisie tych, chto nibyta pavinien udzielničać u pieradačy Sałaŭjova na telekanale «Rasija». Havorka viałasia jašče da taho času, jak stała viadoma, što heta fejk.
Alaksandr Zimoŭski. Fota z facebook.com.
«Naša Niva»: Ci praŭda, što vas zaprašajuć u pieradaču Sałaŭjova, vy budziecie ŭdzielničać?
Alaksandr Zimoŭski: Nie, ja nie ŭdzielničaju. Zaprašeńnie ja atrymaŭ pa elektronnaj pošcie, ale paličyŭ jaho fejkam pa šerahu prykmiet. Ale i nie budź jano fejkam, abyšłosia b tam biez majho ŭdziełu, pakolki ŭ vyznačany ŭ zaprašeńni čas (11 studzienia) ja zaniaty.
«NN»: Čamu ŭ rasijskich ŚMI apošnim časam aktyŭna musirujecca tema pierajemnika A.R. Łukašenki?
AZ: U mianie niama padstaŭ dla taho, kab havaryć ab aktyŭnym musiravańni hetaj temy. Zvyčajna takoha rodu materyjały pišuć minskija karespandenty rasiejskich ŚMI, i apošni raz hetaja tema ŭspłyvała ŭ suviazi sa śmierciu Isłama Karymava. Jość jašče šerah patryjatyčnych resursaŭ u Rasii, jakija kormiacca z hetaj temy. Ale ŭ Biełarusi ŭsie ich aŭtary, jak i sami resursy, prachodziać pa artykule «biełarusafobija». Tamu kazać ab płanamiernaj aktualizacyi Rasiejaj/Kramlom i h.d. temy pierajemnaści ŭłady ŭ Biełarusi, na moj pohlad, zaŭčasna.
«NN»: Ci niama ŭ rasijskich elit žadańnia źmianić Łukašenku na bolš łajalnaha kiraŭnika?
AZ:
U dadzienym vypadku heta, chutčej, tema dla aniekdota:
— Ci moža tyhr źjeści tonu miasa?
— Źjeści to jon źjeść, dy chto ž jamu daść.
Kožny raz, kali pačynajecca havorka pra pošuk pierajemnika, ludzi ź ćviarozym rozumam zadajuć kontrpytańnie: a navošta šukać hetaha pierajemnika? Heta čysta ekanamičny padychod, i ŭ rasijskich elitach isnuje kansiensus pa pytańni supracoŭnictva ź Biełaruśsiu.
Kali koratka, to ŭmoŭny «Kreml» zychodzić z taho, što dziaržaŭny ład, ułada i ekanomika ŭ Biełarusi — heta prablema samich biełarusaŭ. A na pieršy płan vychodzić novy pryncyp našych uzajemaadnosin. Zhodna ź jakim, Biełaruś volnaja pastupać i žyć tak, jak joj padabajecca. A Rasieja volnaja ad taho, kab apłačvać Biełarusi hetuju svabodu.
Jość jašče adzin niuans — absalutnaje nieprymańnie pretenzij Zachadu da Biełarusi i da Rasiei ŭ našych krainach prykładna adnolkavaje. To bok u nas adzinaja stratehičnaja ideałahičnaja pazicyja, a «šalonaja biełarusizacyja» i «russkij mir'» — heta ŭsiaho tolki drobnyja roznahałośsi pa taktyčnych pytańniach.
«NN»: Ci nie pačynajecca ŭ rasijskich ŚMI čarhovaja kampanija suprać kiraŭnictva Biełarusi, jak było ŭ 2010 z «Chrosnymi baćkami»?
AZ: Vy całkam spraviadliva zaŭvažyli, što ŭsio heta nosić jarka vyjaŭlenyja prykmiety kampaniejščyny. Zvyčajna takoha rodu infarmacyjnyja akcyi pravodziacca dla pasłableńnia / ŭmacavańnia pieramoŭnych pazicyj bakoŭ. U dadzienym vypadku havorka idzie pra ŭsim viadomuju prablemu cen na enierhanośbity, ustalavanych raniej biełaruska-rasijskimi damovami, i isnujučaj biełaruskaj zapazyčanaści. Punkt hledžańnia bakoŭ viadomy, ja nie budu paŭtaracca.
Kožny z bakoŭ vykładaje svaju pazicyju, u tym liku i praź ŚMI. A stupień ahresiŭnaści vykładu zaležyć tolki ad ryzyki i talentu vykanaŭcaŭ, jakija pracujuć u hetych ŚMI. U hetym kantekście aktualizacyja temy Biełarusi i asabista jaje prezidenta całkam mahčymaja. Da jakoj stupieni heta moža akazacca baluča i kryŭdna dla biełaruskaha boku, ja nie biarusia pradkazvać.
Kali ž kazać pra kankretnuju pazicyi Pucina, jana viadomaja: «Pacta sunt servanda», abo «Padpisaŭsia — płaci». Ab pazicyi biełaruskaha boku ja ničoha skazać nie mahu, u siłu niedaśviedčanaści. Adnak mahu zaŭvažyć, što efiektny žest družby i zhody, prademanstravany biełaruskim bokam, budzie nieadkładna acenieny ŭ Rasii samym stanoŭčym čynam.
