Minsuviazi pra błakiroŭku Tor: Abmiažoŭvajecca nie ananimny dostup u internet, a naviedvańnie zabaronienych sajtaŭ
Ministerstva suviazi i infarmatyzacyi Biełarusi prakamientavała błakiroŭku Tor. Abmiažoŭvajecca nie ananimny dostup u internet, a naviedvańnie zabaronienych sajtaŭ, paviedamili ŭ Minsuviazi.
U Minsuviazi nahadali, što ŭ adpaviednaści z patrabavańniami zakanadaŭstva Biełarusi pastaŭščyki internet-pasłuh abaviazany abmiažoŭvać dostup da resursaŭ, što źmiaščajuć infarmacyju, raspaŭsiudžvańnie jakoj zabaroniena. U toj ža čas jość instrumienty (proksi-sierviery, ananimnyja sietki typu Tor i inšyja), što dajuć mahčymaść karystalnikam atrymlivać dostup da zabłakiravanych internet-resursaŭ. U adpaviednaści z pałažeńniem ab paradku abmiežavańnia dostupu da infarmacyjnych resursaŭ, raźmieščanych u internecie, takija instrumienty taksama padlahajuć błakiroŭcy, paviedamili śpiecyjalisty.
«U hetym vypadku nie majecca na mecie zabaranić ananimny dostup karystalnikaŭ u internet. Zadačaj źjaŭlajecca abmiežavańnie dostupu da internet-resursaŭ, jakija źmiaščajuć infarmacyju, raspaŭsiudžvańnie jakoj zabaroniena. Dostup da hetych sajtaŭ abmiežavany ŭ adpaviednaści z zakanadaŭstvam Biełarusi», — padkreślili ŭ Minsuviazi.
«Takija padychody prymianiajucca ŭ mnohich krainach śvietu. Biełaruś nie źjaŭlajecca pieršaj dziaržavaj, jakaja prymianiaje hetu praktyku dla abmiežavańnia dostupu da sajtaŭ ź infarmacyjaj, źmiest jakich nakiravany na ažyćciaŭleńnie ekstremisckaj dziejnaści, niezakonny abarot zbroi, narkatyčnych srodkaŭ, raspaŭsiudžvańnie parnahrafičnych materyjałaŭ, sadziejničańnie niezakonnaj mihracyi i handlu ludźmi, prapahandu nasilla i žorstkaści», — dadali ŭ ministerstvie.
