Pry zakryćci balničnaha praviarajuć adznaki ab vyjeździe za miažu
U baranavickaj paliklinicy №4 (byłoj čyhunačnaj) pry zakryćci balničnaha supracoŭnica rehistratury pravieryła daty vyjezdaŭ za miažu ŭ pašparcie haradžanina Alaksieja Ždanoviča.
Mužčyna aburany i ličyć dziejańni supracoŭnicy niepravamiernymi. U administracyi palikliniki zapeŭnivajuć, što ź lutaha 2016 hoda pry zakryćci balničnaha lista miedrabotnikaŭ abaviazali praviarać, ci vyjazdžaŭ pacyjent za miažu, piša intex-press.by.
«Što treba, toje i šukaju»
Alaksiej Ždanovič u piatnicu, 21 kastryčnika, pryjšoŭ zakryvać balničny. Učastkovy lekar paprasiŭ pastavić nieabchodnyja štampy na listok niepracazdolnaści ŭ kabiniecie rehistracyi balničnych listkoŭ. Pry rehistracyi listka ŭ mužčyny z supracoŭnikam palikliniki paŭstaŭ kanflikt:
«Mianie aburyła, što nieznajomy čałaviek pačaŭ «kapacca» ŭ maim pašparcie. A kali ja, da prykładu, nie chaču pakazvać svaje štampy ab razvodach abo kolkaść dziaciej? Pašpart usio-taki asabisty dakumient».
Na pytańnie, što jana šukaje ŭ pašparcie, supracoŭnica adkazała: «Što treba, toje i šukaju». Na jaho zdahadku «źbirajecie źviestki ab vyjeździe haradžan za miažu dla prakuratury?» jana adkazała «tak».
Hetyja słovy niepryjemna ździvili Alaksieja. A praź niekalki dzion daty viz u pašparcie pry zakryćci balničnaha pravieryli i ŭ jaho žonki. Žonka Alaksieja admoviłasia pieradavać pašpart u ruki supracoŭnika rehistratury i prapanavała pakazać patrebnyja staronki. Rehistratar nakiravała jaje da zahadčycy palikliniki. Adnak, sa słoŭ Alaksieja, nichto nie pakazaŭ dakumienty, jakija abhruntoŭvajuć dziejańni supracoŭnika rehistratury.
U instrukcyi ŭsio prapisana
Sa słoŭ zahadčycy haradskoj palikliniki №4 Iny Bieraziuk, Alaksiej Ždanovič — pieršy haradžanin, kaho aburyła pravierka viz u pašparcie ŭ paliklinicy. Miedyki adznačajuć, što dla ich pravierka pašpartoŭ na najaŭnaść vyjezdaŭ za miažu — dadatkovaja nahruzka i «hałaŭny bol», adnak jany — vykanaŭcy zakona.
«U daktaroŭ jość instrukcyja ab paradku praviadzieńnia ekśpiertyzy časovaj niepracazdolnaści, i jany abaviazanyja jaje vykonvać», — adznačyła Iryna Šejna, namieśnica zahadčycy miedycynskaj ekspertyzy i reabilitacyi haradskoj palikliniki №4.
Instrukcyja abviaščaje, što miedrabotnik abaviazany ŭnieści ŭ miedycynskija dakumienty infarmacyju ab vyjeździe pacyjenta za miežy RB. Novaŭviadzieńnie, prapisanaje ŭ pastanovie Ministerstva achovy zdaroŭja №105, uvajšło ŭ dziejańnie ŭ lutym 2016 hoda.
Kantrol za vykanańniem režymu pacyjenta viadzie doktar, adznačyła Iryna Šejna. U vypadku nievykanańnia pacyjentam režymu doktar abaviazany ŭnieści ŭ listok niepracazdolnaści zapis «parušeńnie režymu», što ŭ dalejšym moža paciahnuć za saboj źnižeńnie sumy abo admovu ad vypłaty dapamohi pa časovaj niepracazdolnaści pracadaŭcam.
Pryvatny vypadak
Toje, što ŭ Alaksieja i jaho žonki vizy ŭ pašparcie pravieryŭ supracoŭnik rehistratury, Iryna Šejna nazvała pryvatnym vypadkam, padčas jakoha «supracoŭnik rehistratury pierapraviaraŭ pracu doktara», tamu što ŭ palikliniku pastupiŭ zvanok ab parušeńni pacyjentam režymu znachodžańnia na balničnym. Alaksiej śćviardžaje, što režym nie parušaŭ i za miažu padčas balničnaha nie jeździŭ.
Juryst Siarhiej Zikracki ŭvažaje dziejańni supracoŭnika rehistratury niepravamiernymi. Z adnaho boku, śćviardžaje juryst, jość ukaz prezidenta ab dakumientavańni nasielnictva, u jakim nie ahavorana, što asoba, jakaja atrymlivaje pašpart, nie maje prava prahladać u im staronki. Ź inšaha boku, važna razumieć, jakaja była meta supracoŭnicy, bo haradžanin pieradaŭ joj pašpart dla taho, kab taja spraŭdziła asobu čałavieka.
«Kali rehistratar pačynaje hladzieć inšyja staronki ŭ pašparcie, to, chutčej za ŭsio, jon pieraśleduje svaju asabistuju metu albo źbiraje hetuju infarmacyju, kab pieradać doktaru, ale, pavodle zakona, heta pavinien kantralavać sam doktar», — kaža Siarhiej Zikracki i ličyć, što Alaksiej maje prava skardzicca na dziejańni supracoŭnika rehistratury ŭ administracyju palikliniki.