«U tym, što zdaryłasia, vinavaty sam inśpiektar» — abvinavačany ŭ spravie ab DTZ z daišnikam ahučyŭ svaju viersiju
U sudzie Centralnaha rajona Minska idzie praces pa hučnym DTZ: daišnik pasprabavaŭ zatrymać matacyklista, a toj — vypadkova ci nie — pajechaŭ. U vyniku milicyjant pravioŭ u komie 1,5 miesiaca, a kiroŭca matacykła čakaje prysudu ŭ SIZA.
Paśla pierapynku abvinavačvany Siarhiej Šaŭcoŭ narešcie daŭ pakazańni. Pa jaho słovach, numara na matacykle ŭ jaho nie było, bo jon advaliŭsia pa darozie.
Siarhiej Šaŭcoŭ
Taksama matacykł nie prajšoŭ techahlad. Šaŭcoŭ zapeŭniŭ, što jakraz jechaŭ na STA, kab heta vypravić.
«Ja śpiašaŭsia, bo chacieŭ pierad STA zajechać u abmieńnik. Tamu parušyŭ praviły i vyjechaŭ na tramvajnyja puci. Kali ja stajaŭ na ich, da mianie padbieh Taŭpiniec, štości skazaŭ nierazborliva. Zatym skazaŭ: «Vyzvalcie puci i pakažycie dakumienty» i zrabiŭ ruch rukoju naprava. Ja padumaŭ, što jon choča, kab ja źjechaŭ ubok i pakazvaje kudy», — skazaŭ Šaŭcoŭ.
Zatym, raskazaŭ abvinavačvany, jon trochi adkaciŭ matacykł nazad, kab abjechać inśpiektara i ŭstać tam, dzie toj pakazvaŭ.
«Ale jak tolki ja pačaŭ ruch, Taŭpiniec nakinuŭsia na mianie», — skazaŭ Šaŭcoŭ.
Pa jaho słovach, inśpiektar pačaŭ chapać jaho za ruki i rul matacykła. Praz heta palcy kiroŭcy saśliznuli z ryčaha sčapleńnia, a pravaja ruka, na jakuju cisnuŭ Taŭpiniec, praz hety cisk vykruciła haz, i matacykł rezka rvanuŭ ź miesca.
«Ja zhubiŭ kantrol nad matacykłam z momantu ŭmiašalnictva inśpiektara ŭ praces kiravańnia», — kaža Šaŭcoŭ.
Jon kaža, što mahčymaści skinuć chutkaść prosta nie mieŭ — usie jaho namahańni byli nakiravanyja na toje, kab matacykł nie ŭpaŭ na darohu. Tym časam ruka inśpiektara lažała na jaho ruce, naciskajučy haz. Tamu spynić matacykł kiroŭca taksama nie moh.
Hetym aburyŭsia inśpiektar.
«Vy chłusicie», — emacyjna zajaviŭ Taŭpiniec.
«Dzie lažać ruki, možna pabačyć na zapisach», — adkazaŭ jamu Šaŭcoŭ.
Pa słovach abvinavačvanaha, jamu vielmi škada, što Taŭpiniec atrymaŭ takija ciažkija traŭmy. Ale svaju vinu Šaŭcoŭ tak i nie pryznaŭ.
«Z majho punktu hledžańnia vinavaty ŭ tym, što zdaryłasia, sam Taŭpiniec», — paviedamiŭ matacyklist.
Nie pryznaŭ jon i supracivu inśpiektaru:
«Ja ž nie trymaŭ jaho, nie šturchaŭ, nie ciahnuŭ za saboj».
Taksama Šaŭcoŭ śćviardžaje, što źjechać ź miesca jon nie płanavaŭ.
«U mianie z dakumientami było ŭsio narmalna, i hareła čyrvonaje śviatło — źjazdžać było b varjactvam. Tak, moža raniej u mianie i byli padobnyja parušeńni. Ale siońnia mnie jość, što hublać: ja pabudavaŭ dom, pasadziŭ dreŭcy, pacichu rychtujusia zavieści dzicia», — zapeŭniŭ jon.
Pra parušeńni ŭzhadaŭ i sudździa Jeśman, nahadaŭšy, što ich z 2007 hoda było až 52. I ŭ 2014 i ŭ 2015 hadach Šaŭcova pazbaŭlali pravoŭ praz parušeńnie chutkaści. A niekatoryja štrafy jon atrymlivaŭ, kirujučy mašynaj u toj čas, kali byŭ pazbaŭleny pravoŭ.
«Maja praca — absłuhoŭvać kampjutary. Dla hetaha treba ruchacca, inakš ja straču srodki dla isnavańnia», — patłumačyŭ Šaŭcoŭ.
Zatym jaho advakaty niečakana paprasili pryciahnuć da hramadzianskaj adkaznaści jašče i ŭładalnika inkasatarskaj mašyny — to bok «Bielinviestbank». Jany abhruntavali heta tym, što mašyna taksama ŭdzielničała ŭ DTZ. Takim čynam, prapanavali advakaty, pazoŭ inśpiektara ŭ 50 tysiač rubloŭ pavinien byŭ by padzialicca pamiž Šaŭcovym i bankam. Praŭda, sudździa Jeśman hetaje chadajnictva adchiliŭ.
Darečy, tysiaču rubloŭ paciarpiełamu ŭžo pieraličyła žonka Šaŭcova. Takim čynam, kali sud zadavolić pazoŭ inśpiektara, matacyklist pavinien budzie vypłacić «usiaho tolki» 49 tysiač.
Praces pa spravie praciahniecca 27 kastryčnika.
Čytajcie taksama: Inśpiektar DAI, jaki paśla avaryi z matacyklistam pravioŭ u komie paŭtara miesiaca, prosić $25 tysiač kampiensacyi
