Na BT zładzili majstar-kłas dla pradstaŭnikoŭ «DNR» i Prydniastroŭja
19-22 kastryčnika ŭ Minsku prachodziŭ mižnarodny moładzievy forum «Lidar XXI stahodździa». Mierapryjemstva zładziŭ kiraŭnik prarasijskaj arhanizacyi «Ruś maładaja» Siarhiej Łušč.
Kiraŭnik «Rusi maładoj» Siarhiej Łušč atrymlivaje značok ad viadučaha śpiecyjalista Fonda Harčakova Vitala Sałanieckaha.
Infarmacyjnymi partniorami vystupili Dom Maskvy ŭ Minsku, «Rossotrudničiestvo», Fond Harčakova, Departamient źniešnieekanamičnych i mižnarodnych suviaziaŭ horada Maskvy, sajt russkie.org, ahienctva «Rydus». Apošniaje zajmaje ŭ dačynieńni da biełaruskaj ułady nie samuju družalubnuju pazicyju i pałochaje čytačoŭ strašyłkami, što «Biełaruś sychodzić ad Rasii u bok Zachadu», a jašče jany prapanoŭvali Alaksandru Łukašenku ŭ abmien na naftavyja vyški addać Rasii ŭsiu Biełaruś całkam.
Ciapier ža hetyja vydańni ładziać u centry Minska kanfierencyi.
Haściami mierapryjemstva stali samyja roznyja ludzi: pamočnica pasła Rasii ŭ Biełarusi Maryja Navadvorskaja, namieśnik staršyni ŁDPB Siarhiej Hajdukievič, fiłosaf Alaksiej Dziermant, palitołah Juryj Šaŭcoŭ, pradstaŭnik ruchu zachodnierusistaŭ Leŭ Kryštapovič, deputat Minskaha harsavieta ad kamunistaŭ Hieorhij Atamanaŭ, kaardynatar prajekta «Vakno ŭ Rasiju» Arkadź Biejnienson, pieršy sakratar minskaha haradskoha kamiteta BRSM Juryj Čačukievič.
Jašče siarod vystupoŭcaŭ akazaŭsia ryełtar Alaksandr Haraščenia, jaki atrymaŭ viadomaść zajavami pra narodnaha paeta Biełarusi Ryhora Baradulina, jakoha jon nazvaŭ «nacysckaj svałatoj». Paśla abureńnia z boku hramadskaści supracoŭnictva z Haraščeniem spyniŭ BDU, a taksama jon pazbaviŭsia pracy ŭ ahienctvie pa nieruchomaści.
Haraščenia vystupiŭ z treninham «Lidarstva i efiektyŭnaja kamunikacyja». U prahramcy mierapryjemstva jaho paznačyli jak «vykładčyka BDU». Pryčym treninh adbyvaŭsia na bazie fakulteta fiłasofii i sacyjalnych navuk BDU, jaki ŭznačalvaje Vadzim Hihin.
Taksama padčas kanfierencyi adbyłasia prezientacyja knihi Stanisłava Byška «Brekzit i jeŭraskieptyki: jeŭrapiejcy suprać ES».
22 kastryčnika ŭdzielniki forumu naviedvali Biełteleradyjokampaniju. Na svaich staronkach u sacyjalnych sietkach pradstaŭniki forumu vykłali śpis udzielnikaŭ, jakija mielisia pryjści na BT.
Źviartaje ŭvahu, što nasuprać niekatorych proźviščaŭ paznačałasia prynaležnaść da toj ci inšaj krainy. Dyk možna pabačyć, što ŭ śpisie ažno čatyry čałavieki z «DNR», a jašče dvoje z Prydniastroŭja.
Heta niepryznanyja Biełaruśsiu dziaržaŭnyja ŭtvareńni, stvoranyja na terytoryi Ukrainy i Małdovy. Miž tym Biełaruś na aficyjnym uzroŭni pryznaje terytaryjalnuju cełasnaść Ukrainy i Małdovy.
Hości BT — studenty danieckich VNU. Pra Filipa Panamarenku i Jahora Dzibrova, naprykład, pisaŭ sajt «ministerstva zamiežnych spraŭ DNR» sioleta ŭ mai. Maŭlaŭ, «pradstaŭniki DNR» pryniali ŭdzieł u «IX dypłamatyčnym sieminary», jakija adbyvaŭsia ŭ Kalininhradzie pry padtrymcy Fonda Harčakova.
Jak bačna z dalejšych paviedamleńniaŭ, prynaležnaść da nieisnujučych dziaržaŭnych utvareńniaŭ nie stała pieraškodaj dla trapleńnia moładzi na BT. Viadučy Andrej Kryvašejeŭ vykłaŭ u svaim fejsbuku zdymak z podpisam: «Debaty byli žarsnyja i ščyryja. Kalehi trymalisia hodna i amal nie pałochalisia kamier».
Fota z fejsbuka Andreja Kryvašejeva.
Naprykancy mierapryjemstva ŭdzielniki jašče pahulalisia ŭ zabaŭku «Dypłamatyja» — «simulatar palityčnaj situacyi ŭ pačatku XX stahodździa».
Adno z paviedamleńniaŭ hučała tak: «Hiermanija zajmaje Narviehiju, Turcyja ŭvodzić vojski ŭ Bałharyju, Rasija zajmaje Biełaruś, Anhlija zavajoŭvaje Ispaniju, Vienhryja akupuje Charvatyju. Śviet zality kryvioj, lidary krain spadziajucca tolki na siabie. Prajšła pałova hulni, a ŭdzielniki tak i nie ŭśviadomili asnoŭnuju zadumu hulni».
Hulnia hulnioj, ale pry nakładańni na sučasnyja miežy hučyć usio heta dastatkova złaviesna.
