«Śpieŭny schod»: Śpiavajem Maniušku razam! — 25 kastryčnika
25 kastryčnika zaprašajem usich žadajučych śpiavać pieśni na muzyku Stanisłava Maniuški. «Śpieŭny schod» projdzie ŭ «Halerei Ŭ».
Słavuty kampazitar, dyryžor, znaŭca biełaruskaha falkłoru, stvaralnik biełaruskaj i polskaj nacyjanalnych opier naradziŭsia amal 200 hod tamu ŭ vioscy Ubiel Červieńskaha rajona. Ciapier na miescy byłoj siadziby staić pamiatny znak.
Stanisłaŭ Maniuška napisaŭ muzyku da 309 piesien, ź ich 22 tvory — na vieršy Jana Čačota, 20 — Uładzisłava Syrakomli. Maniuška stvaryŭ šmat solnych i charavych sačynieńniaŭ na relihijnuju tematyku.
Tvorčy śvietapohlad Stanisłava Maniuški sfarmavaŭsia ŭžo ŭ junackija hady, što prajšli na Biełarusi. Z malenstva kampazitar adčuŭ charastvo i pryvabnaść našaha falkłoru. I ŭ bolš poźnija hady, užo na čužynie, ščodra čerpaŭ natchnieńnie z hetaj narodnaj krynicy.
My adčujem heta, kali budziem śpiavać pieśni na muzyku vialikaha kampazitara! Zaprašajem usich žadajučych razvučyć i razam zaśpiavać niekalki viadomych tvoraŭ Stanisłava Maniuški.
A jašče — pra tvorčaść Stanisłava Maniuški nam raspaviadzie prafiesar Viktar Skarabahataŭ, jaki ŭsio žyćcio daśleduje fienomien kampazitara.
Marharyta Laŭčuk, salistka-saprana Vialikaha teatra opiery i baleta Biełarusi i Muzyčnaha doma «Kłasika», vykanaje niekalki tvoraŭ Maniuški.
Prychodźcie 25 kastryčnika: Halereja Ŭ, pr-t Niezaležnaści, 37A, Minsk. Pačatak a 19.00. Uvachod volny!
«Śpieŭny schod» uviesnu 2014 hoda raspačali Alaksiej Čubat i Siarhiej Doŭhušaŭ. Na «Śpieŭnym schodzie» moža śpiavać kožny čałaviek. Prajekt dapamahaje zachoŭvać niemateryjalnuju kulturnuju spadčynu Biełarusi.
