Fielčar SIZA №1, dzie pamior Ihar Pcičkin, prysudžany da troch hadoŭ kałonii
Alaksandr Kryłoŭ, fielčar miedčaści minskaha SIZA № 1, dzie ŭ 2013 hodzie pamior 21-hadovy Ihar Pcičkin, pryhavorany da troch hadoŭ pazbaŭleńnia voli ŭ papraŭčaj kałonii va ŭmovach pasialeńnia.Kryłoŭ pryznany vinavatym u nienaležnym vykanańni prafiesijnych abaviazkaŭ (č. 2 art. 162 KK), što pryviało da śmierci asudžanaha Pcičkina. Jamu taksama zabaroniena zajmacca prafiesijnaj dziejnaściu na praciahu piaci hadoŭ.
Prysud abvieščany 21 kastryčnika ŭ sudzie Maskoŭskaha rajona Minska sudździoj Śviatłanaj Bandarenkaj. Takim čynam, sud padtrymaŭ pazicyju prakurora, jaki patrabavaŭ mienavita takoha pakarańnia.
Miera strymańnia ŭ dačynieńni da Kryłova zastajecca raniejšaj — padpiska ab niavyjeździe.
Fielčar paviedamiŭ žurnalistam, što maje namier abskardzić prysud, ale ad kamientaraŭ admoviŭsia.
Vystupajučy ŭ sudzie 17 kastryčnika z apošnim słovam, Kryłoŭ zajaviŭ, što nie ličyć siabie vinavatym. «Ja mahu vykazać zdahadku, što pamiž maimi dziejańniami jak miedrabotnika pry vykanańni prafiesijnych abaviazkaŭ i ŭźnikłymi nastupstvami niama nijakaj pryčynnaj suviazi. Mienavita tamu ja nie pryznaju siabie vinavatym i prašu sud mianie apraŭdać», — skazaŭ jon.
Trahiedyja zdaryłasia bolš jak try hady tamu. U mai 2013 hodu sud Zavodskaha rajona Minska pryhavaryŭ 21-hadovaha Ihara Pcičkina da troch miesiacaŭ administracyjnaha aryštu za toje, što jon kiravaŭ aŭtamabilem, budučy pazbaŭlenym paśviedčańnia vadziciela. U kancy lipienia maładoha čałavieka nakiravali ŭ SIZA № 1, a praź niekatory čas supracoŭniki izalatara paviedamili svajakam, što Pcičkin skanaŭ 4 žniŭnia ad sardečnaha prystupu.
Nieŭzabavie paśla zdareńnia śledstva rastłumačyła, čamu Pcičkin apynuŭsia ŭ miedčaści, dzie jon pamior. U pryvatnaści paviedamlałasia, što maładoha čałavieka špitalizavali, tamu što ŭ jaho stali vyjaŭlacca i narastać prykmiety vostraha psichičnaha rasstrojstva: halucynacyi, tryźnieńnie, admaŭleńnie ad ježy i pitva, manija pieraśledu. Małady čałaviek nibyta sistematyčna ŭžyvaŭ ałkahol i kurylnyja sumiesi z narkatyčnymi i psichatropnymi rečyvami.
U kancy vieraśnia 2013 hoda ŭpraŭleńnie Śledčaha kamiteta pa Minsku raspačało spravu ŭ dačynieńni da miedrabotnika SIZA Alaksandra Kryłova, jaki padazravaŭsia ŭ nienaležnym vykanańni prafiesijnych abaviazkaŭ, što paciahnuła śmierć Pcičkina. Paciarpiełaj pa hetaj spravie pryznali maci pamierłaha Žannu Pcičkinu.
U kancy śniežnia 2014 hoda USK zakryła spravu, a ŭ pačatku 2015 hoda śledčyja abviaścili, što małady čałaviek nibyta pakutavaŭ ad sindromu spałučanaj zaležnaści ad psichaaktyŭnych rečyvaŭ i ałkaholu i z pačatku adbyvańnia pakarańnia ŭ jaho ŭźnikła vostraje psichičnaje rasstrojstva z-za admieny spajsaŭ. Heta vyklikała parušeńnie śviadomaści i halucynacyi, u suviazi z čym Pcičkin byŭ špitalizavany ŭ miedčaść SIZA i ŭ metach praduchileńnia členaškodnictva zafiksavany miakkimi ramianiami da łožka. Pavodle zaklučeńnia SK, Pcičkina pamior ad vostraj sardečna-sasudzistaj niedastatkovaści, jakaja ŭźnikła na fonie sindromu, što raźviŭsia. Takim čynam, spravu ŭ dačynieńni da Kryłova spynili, bo «dapuščanyja parušeńni słužbovych instrukcyj» z boku miedpiersanału «nie byli ŭ pramoj pryčynnaj suviazi z uźnikłymi nastupstvami».
Svajaki Pcičkina nie pahadzilisia z vysnovami śledstva i padali skarhu ŭ orhany prakuratury. Na praciahu paŭtara hoda rasśledavańnie niekalki razoŭ adnaŭlałasia Hienprakuraturaj i zakryvałasia na padstavie rašeńnia Śledčaha kamiteta. Apošni raz Hienprakuratura admianiła rašeńnie SK i pryniała spravu da razhladu ŭ siaredzinie hetaha hoda.
Praktyčna adrazu paśla śmierci Pcičkina jaho svajaki stali damahacca raspačynańnia kryminalnaj spravy pa fakcie źbivańnia maładoha čałavieka, bo na jaho ciele byli vyjaŭlenyja šmatlikija vialikija siniaki. Śledčyja orhany im u hetym admovili, zajaviŭšy, što faktaŭ prymianieńnia hvałtu, fizičnaj siły i śpiecsrodkaŭ u dačynieńni da Pcičkina nie było. Tym nie mienš sioleta śledstva pryznała fakt cialesnych paškodžańniaŭ u Pcičkina, adnak admoviłasia raspačać spravu z hetaj nahody, rastłumačyŭšy, što «ŭstalavać pachodžańnie cialesnych paškodžańniaŭ jak padčas rasśledavańnia kryminalnaj spravy, tak i pry praviadzieńni pravierki pavodle materyjałaŭ nie ŭjaŭlajecca mahčymym».
