Tramp abiacaje pryznać vynik vybaraŭ… U vypadku svajoj pieramohi
Kandydat u prezidenty ZŠA ad Respublikanskaj partyi Donald Tramp zajaviŭ, što pryznaje vyniki vybaraŭ, kali vyjhraje.
«Ja abiacaju ŭsim maim vybarščykam i prychilnikam i ŭsim hramadzianam Złučanych Štataŭ, što ja całkam prymu vyniki hetych vialikich i histaryčnych prezidenckich vybaraŭ — kali ja vyjhraju», — skazaŭ Tramp na mitynhu ŭ Ahajo.
«Ja pryznaju dakładny vynik vybaraŭ, adnak ja taksama zachoŭvaju za saboj prava jurydyčna asprečyć sumniŭny vynik», - dadaŭ jon.
Jaho vystup na mitynhu ŭ Ahajo staŭ pieršym źjaŭleńniem Trampa na publicy paśla treciaha i zaklučnaha raŭndu debataŭ z kandydatam ad demakrataŭ Chiłary Klintan.
Padčas debataŭ respublikanski kandydat, jaki apošnija niekalki dzion paŭtaraŭ, što hałasavańnie ŭ ZŠA sfalšavanaje, admoviŭsia prama adkazać na pytańnie, ci prymie jon vyniki prezidenckich vybaraŭ u vypadku parazy, čym vyklikaŭ chvalu krytyki.
Kiraŭnik vybarčaj kampanii Tramp Kielien Konvej paźniej patłumačyła, što jon mieŭ na ŭvazie, što nie pryznaje parazy, pakul «vyniki nie buduć kančatkova viadomyja».
