Alina Tałaj za noč «prahłynuła» Marcinoviča, a ciapier čytaje bijahrafiju Klintan
Lohkaatletcy Alinie Tałaj niadaŭniaja Alimpijada ŭ Rya nie pryniesła ničoha dobraha — adno rasčaravańnie. Prajšoŭ miesiac, i Alina niečakana dla mnohich materyjalizavałasia ŭ amierykanskaj Fłarydzie, dzie pačała padrychtoŭku da novaha siezona. Taras Ščyry z Tribuna.com źviazaŭsia ź dziaŭčynaj i pahutaryŭ ź joju ab prozie Viktara Marcinoviča, lubovi da matacykłaŭ i zrazumieŭ, što sychodzić z sportu biez alimpijskaha miedala Tałaj nie źbirajecca.
Tribuns.com
U razmovie zakranuli nie tolki aśpiekty spartyŭnaha žyćcia, ale i luboŭ Aliny da knihaŭ
«Niadaŭna, darečy, u mianie źjaviłasia kniha «Voziera radaści» Viktara Marcinoviča, — kaža jana. — Mianie hety tvor tak zaciahnuŭ, što za adzin viečar, pad harbatu, usiu knihu pračytała. Chtości ź litaraturnych krytykaŭ raman razhramiŭ, ale mianie jon zacikaviŭ. Bo što dla čytača hałoŭnaje ŭ knizie? Žadańnie dačytać jaje da kanca i daviedacca raźviazku. Ja nie čytaju dla taho, kab čytać. Žanočyja ramančyki, Dašu Dancovu ci jašče kaho-niebudź z hetaj katehoryi čytać nie budu. U mianie pastupova vypracavaŭsia litaraturny hust, i ja akuratna stała stavicca da taho, što čytać, što ŭkładać u svaju hałavu. Zaraz u śviecie vielmi šmat raznastajnaj infarmacyi. I časam ad jaje varta siabie aharodžvać.
— Pamiataješ jak pačała vučyć biełaruskuju movu?
- Napeŭna, jašče da škoły.
- U dziciačym sadku?
- A ja nie chadziła ŭ sadok. Mnie baćki z movaj dapamahali doma. Mianie zvyčajna pakidali na apieku babul i dziadulaŭ. Ale z-za taho, što ja nie chadziła ŭ sadok, prablem u znosinach ź dziećmi nie adčuvała. Ja da 20 hadoŭ žyła z baćkami ŭ internacie aršanskaha zavoda pryboraŭ aŭtamatyčnaha kantrolu. U nas na paviersie vielizarny kalidor, i my ŭvieś čas na im hulali z chłopcami. Heta byŭ naš vialiki dziciačy sad. I ja nie škaduju, što vyrasła ŭ internacie. Sustreła tam svaich dobrych siabroŭ, ź jakimi da hetaha času kantaktuju. Baćki, darečy, tam i ciapier žyvuć. Jašče pracujuć. Baćka - kantraloram na zavodzie, maci — u miedkaledžy.
- Čytaješ knihi na anhlijskaj movie?
- Tak, voś niadaŭna nabyła aŭtabijahrafiju Chiłary Klintan, kandydata ŭ prezidenty ZŠA. U Amierycy ŭ listapadzie adbuducca vybary, i ja chaču paznajomicca z hetym čałaviekam, viedać, što ŭ ich za tam bačańnie śvietu ź Biełaha doma. A što? Mnie cikava.
