U Aŭstryi źniasuć dom, dzie naradziŭsia Adolf Hitler
Aŭstryjski ŭrad choča źnieści trochpaviarchovy budynak na vulicy Zalcburhier-Farštat ŭ horadzie Braŭnaŭ-am-In, bo jano słužyć miescam pałomnictva dla nieanacystaŭ.
AFP
Budučynia doma aktyŭna abmiarkoŭvajecca ŭ Aŭstryi ŭ apošnija hady. Adna častka hramadstva vystupaje za znos pabudovy, druhaja ličyć, što treba pakinuć budynak i znajści jamu prymianieńnie.
Ale, jak zajaviŭ ministr unutranych spraŭ Aŭstryi Volfhanh Sabotka, hrupa ekśpiertaŭ vyrašyła, što dom nieabchodna źnieści, piša hazieta Die Presse. Ad jaho zastaniecca tolki padmurak.
Siońnia na domie abo pobač ź im niama nijakich zhadak pra toje, što ŭ im naradziŭsia Hitler. La ŭvachodu ŭ budynak ŭstanoŭlenaja miemaryjalnaja doška z nadpisam: «Za mir, svabodu i demakratyju. Nie fašyzmu. Miljony zahinułych nahadvajuć nam pra heta». Imia Hitlera tam nie zhadvajecca.
Na miescy źniesienaha doma pabudujuć novy budynak, u jakim buduć raźmieščanyja administracyjnyja struktury abo dabračynnaja arhanizacyja.
Dom, u jakim naradziŭsia Hitler, byŭ pradmietam sudovaj sprečki na praciahu niekalkich hadoŭ. Aŭstryjski ŭrad arandavaŭ budynak u jaho ŭłaśnicy z 1972 hoda.
U im znachodziŭsia centr dla ludziej z abmiežavanymi mahčymaściami. U apošnija hady košt arendy składaŭ 4,8 tys. jeŭra ŭ miesiac.
Uładalnica admaŭlałasia pradavać dom uładam i navat nie dazvalała zrabić u im kapitalny ramont. U suviazi z hetym z 2011 hoda budynak pustavaŭ. U vyniku deputaty vyrašyli pryniać zakon, jaki dazvolić im prymusova kanfiskavać budynak i vypłacić ułaśnicy kampiensacyju.
«Za apošnija hady my pryjšli da vysnovy, što eksprapryjacyja — adziny sposab paźbiehnuć taho, kab hety dom vykarystoŭvaŭsia prychilnikami nacystaŭ [jak miesca dla pakłanieńnia]», — zajaŭlaŭ raniej pres-sakratar ministerstva ŭnutranych spraŭ Aŭstryi Karł-Chajnc Hrundbiek.
Baćki Hitlera pražyli ŭ domie na Zalcburhier-Farštat ŭsiaho try tydni, a potym pierajechali. Kali Hitleru było try hady, siamja źjechała z Braŭnaŭ-am-In.
